ნეტგაზეთი | 23 მაისს ვიწყებთ აუღებელ აქციებს დედაქალაქში — გოლეთიანი 23 მაისს ვიწყებთ აუღებელ აქციებს დედაქალაქში — გოლეთიანი – Netgazeti
RU | GE  

23 მაისს ვიწყებთ აუღებელ აქციებს დედაქალაქში — გოლეთიანი

“რიონის ხეობის მცველების” თქმით, “ნამახვანჰესის” გარშემო მთავრობის მიერ 24 აპრილს გავრცელებული განცხადება მიუთითებს, რომ ის არ აკმაყოფილებს აქტივისტთა მოთხოვნებს. მათი თქმით, დღეს ჰესის მშენებლობის მოწინააღმდეგეები სხვადასხვა ქალაქში აქციებს გეგმავენ, 23 მაისს კი თბილისში გადაინაცვლებენ.

“დღეს, 16:00 საათისთვის იგეგმება სხვადასხვა ქალაქში აქციები. რაც შეეხება გრძელვადიან გეგმებს და თბილისში აქციის გადატანას, ვაანონსებთ უკვე თარიღს… მოვემზადებით მთელი ამ პერიოდის განმავლობაში. აქაც[რიონის ხეობაშიც] გაგრძელდება ჩვეულებრივად პროტესტი, რა თქმა უნდა. თან მოვემზადებით და 23 მაისს დავიწყებთ აუღებელ აქციებს დედაქალაქში”, — აღნიშნა ვარლამ გოლეთიანმა და თქვა, რომ დამატებით დეტალებს აქტივისტები თავიანთ გვერდზე, ფეისბუქ ლაივის საშუალებით გაავრცელებენ.

აქტივისტ მირზა ნოზაძის თქმით, ხელისუფლების დღევანდელი განცხადება ეწინააღმდეგება აქტივისტების წინაშე მანამდე გახმიანებულ პოზიციას, რომ დიალოგისას ორივე მხარემ უნდა დათმოს პოზიციები და განიხილებოდეს როგორც ჰესის აშენების, ისე არაშენების შესაძლებლობა.

“შესაბამისად, იმ განცხადებებს, რომლებიც თითქოს ხელისუფლების შერბილებულ პოზიციებს გამოხატავს, ჩვენ ვკითხულობთ, რომ ისინი ისევ იმ პოზიციაზე დგანან, რომ ჰესი ყველა ვარიანტში აშენდება და ცდილობენ ვექტორის გადატანას სხვა მიმართულებით, რათა მოხდეს პროტესტის დეესკალაცია არა ბუნებრივად, არამედ ხელოვნურად.

ჩვენი გეგმები, როგროც ჩვენ ვაცხადებდით, არის უცვლელი. ჩვენ დღეს გვექნება აქციები სხვადასხვა ქალაქებში. აუცილებლად დავანახებთ ხელისუფლებას, რომ მათ ანგარიში უნდა გაუწიონ ხალხს, აქციის მასშტაბს, აუცილებლად უნდა ისაუბრონ პროტესტის აქტორებთან და ისაუბრონ იმ კითხვებზე, რომლებიც გაგვაჩნია ჩვენ”, — აღნიშნა მან.

მთავრობამ დღეს გაავრცელა განცხადება, რომელშიც დასძენს, რომ  “ნამახვანჰესის” მშენებელი კომპანია “ამ ეტაპზე გააგრძელებს მხოლოდ პროექტის პირველი ეტაპის მოსამზადებელ სამუშაოებს ინფრასტრუქტურის მიმართულებით, მოქმედი სამშენებლო ნებართვის ფარგლებში”.

ტექსტის მიხედვით, პრემიერ-მინისტრმა კომპანია “ენკასთან” დადებული ხელშეკრულების შესწავლა იუსტიციის სამინისტროს დაავალა. ამასთან, იუსტიციის სამინისტრომ უნდა იქირაოს საერთაშორისო იურიდიული კომპანია, რომელიც შეისწავლის კონტრაქტის პირობების საერთაშორისო პრაქტიკასთან შესაბამისობას.

რა ხდებოდა მანამდე?

რიონის ხეობაში ვითარება აპრილის დასაწყისში, მას შემდეგ დაიძაბა, რაც სოფელ ნამოხვანში კომპანია “ენკამ”  ნამახვანჰესის მშენებლობის მოსამზადებელი სამუშაოები განაახლა. პროექტის მოწინააღმდეგე აქტივისტების(“რიონის ხეობის მცველების) პროტესტის ფონზე, პოლიციამ ხეობაში გადაადგილება შეზღუდა, შემდეგ კი დაშალა კარვები, რომლებშიც აქტივისტები თვეების განმავლობაში მორიგეობდნენ.

მას შემდეგ, რაც ნამოხვანისკენ მოძრაობა შეიზღუდა, პროტესტმა სოფელ გუმათთან გადაინაცვლა. “რიონის ხეობის მცველებმა” და მათმა მხარდამჭერებმა პროტესტის ნიშნად გზა გადაკეტეს. პროცესს თან ახლდა პოლიციის წინააღმდეგობა და დაკავებები. ნამოხვანისკენ მიმავალი გზაზე, რომელიც იქამდეც ჩაკეტილი იყო, რკინის ბარიერები განალაგეს.

ხეობაში არსებული დაძაბულობის ფონზე, 16 აპრილს ქუთაისში ხელისუფლების წარმომადგენლები ჩავიდნენ და ჰესის მშენებლობის მოწინააღმდეგეთა წარმომადგენლებს შეხვდნენ.”რიონის ხეობის მცველებმა 3 მოთხოვნა წარუდგინეს სახელმწიფოს:

შეწყდეს ჰესის მშენებლობის მოსამზადებელი სამუშაოები, მოიხსნას გადაადგილების შეზღუდვა და მიეცეთ “რიონის ხეობის მცველებს” სოფელ ნამახვანში დაბრუნების, ასევე, ადგილზე კარვებით პროტესტის გაგრძელების საშუალება.

ხელისუფლების წარმომადგენლებმა მაშინ თქვეს, რომ აქტივისტების მოთხოვნებზე საპასუხოდ რამდენიმე დღე იყო საჭირო. ერთადერთი, რაც ხეობაში ხსენებული შეხვედრის შემდეგ შეიცვალა, გუმათის გზაზე განლაგებული რკინის ბარიერების რაოდენობაა: ის მცირედით შემცირდა, თუმცა გადაადგილება ხეობაში უწინდებურად შეზღუდულია.

პროტესტი ნამახვანჰესის წინააღმდეგ

არაერთი არასამთავრობო ორგანიზაცია, ექსპერტი თუ აქტივისტი ამბობს, რომ “ნამახვანჰესის” პროექტი მნიშვნელოვან კითხვის ნიშნებს აჩენს, მათი ნაწილის შეფასებით კი, ჰესის მოსამზადებელი სამუშაოები უკანონოა, რასაც ოპონენტი მხარე უარყოფს. 

მიუხედავად მთავრობის განცხადებისა, რომ ეს ჰესი ქვეყნის ენერგოდამოუკიდებლობას წაადგება, კრიტიკოსი ორგანიზაციები ამბობენ, რომ  ელექტროენერგიის ეს საფასური იმაზე მაღალი იქნება, ვიდრე ენერგობაზარზე სხვა მომწოდებლების მიერ უზრუნველყოფილი ენერგია.

ადგილობრივი აქტივისტები რამდენიმე თვის განმავლობაში, სოფელ ნამოხვანში, კარვებში მორიგეობდნენ და ამ ფორმით ეწინააღმდეგებოდნენ დაგეგმილ მშენებლობას. გაიმართა რამდენიმე ხალხმრავალი აქცია ქუთაისშიც. პროტესტის ფონზე, მთავრობამ მიიღო გადაწყვეტილება, რომ ჰესის სამშნებელო სამუშაოები 9-12 თვის მანძილზე არ იწარმოებს.

გასულ კვირას სახელმწიფომ თქვა, რომ “ნამახვანჰესის” პროექტის “დახვეწის” მიზნით ქმნის ექსპერტთა საბჭოს, რომელსაც ხსენებულ პროექტთან დაკავშირებით გასულ წლებში ჩატარებულ ყველა კვლევას გადასცემენ.

ეკონომიკის მინისტრის განცხადებით, საბჭოს შემადგენლობაში ელიან ყველა დაინტერესებულ მხარეს, მათ შორის, ჰესის მშენებლობის მოწინააღმდეგე აქტივისტების წარმომადგენლებს და უშუალოდ მათ, თუ ამის სურვილი ექნებათ.

“რიონის ხეობის მცველები” სკეპტიკურად უყურებენ აღნიშნულ იდეას და ამბობენ, რომ უპირველესად, მათი პრეტენზიები მიემართება შინაარსს იმ კონტრაქტისა, რომელიც სახელმწიფოსა და ჰესის მშენებელ კომპანიას შორის დაიდო.

მთავრობა ავრცელებს პასუხს “რიონის ხეობის მცველთა” მოთხოვნებზე

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან