პარლამენტთან მიმდინარე აქციის მონაწილეებმა “კომენდანტის საათი” დაარღვიეს. ორგანიზატორები აპირებენ, დემონსტრაციაცია 05:00 საათამდე გააგრძელონ და ასე გააპროტესტონ რეგულაცია, რომელიც, მათი თქმით, “პოლიტიკური იარაღია” მთავრობის ხელში.
აქციის “დაასრულე კომენდანტი!” ორგანიზატორთა შორის არიან მოძრაობა “სირცხვილია”, პლატფორმა “დროა”, პარტიები “გირჩი-მეტი თავისუფლება” და “ლელო”.
“დაუსრულებელი კომენდანტის საათი აუარესებს ჩვენს ფსიქიკურ ჯანმრთელობას. გადაადგილების შეზღუდვა ანგრევს ჩვენს ეკონომიკას.
თვითდასაქმებულ ადამიანებს შეგვიმცირდა ან სრულად წაგვერთვა თავის და ოჯახის რჩენის საშუალება.
კომენდანტის საათის გამო ხელოვნურად იტვირთება საზოგადოებრივი ტრანსპორტი და მასში მყოფი ადამიანები არიან დაავადების საფრთხის ქვეშ.
სინამდვილეში კომენდანტის საათი და გადაადგილების შეზღუდვა ამ მთავრობის პოლიტიკური იარაღია. პანდემიის კონტროლის ნაცვლად გვაკონტროლებენ ჩვენ”, — აღნიშნულია აქციის ორგანიზატორთა განცხადებაში.
აქციის დაწყების შემდეგ რუსთაველის გამზირი გადაიკეტა. ადგილზე მიიტანეს გალიებიც, რომლებზეც ხელისუფლების წარმომადგენელთა ფოტოებია მიმაგრებული.
აქციის მონაწილეები პარლამენტთან მსვლელობით, სამი სხვადასხვა ადგილიდან მივიდნენ.
დღის პირველ ნახევარში მოძრაობა “სირცხვილიას” აქტივისტებს პარლამენტის მიმდებარედ, ტროტუარზე, სცენის მოწყობა სურდათ. აქტივისტთა თქმით, აღნიშნულის საშუალება მათ პოლიციამ არ მისცა.
მათივე ინფორმაციით, პოლიცია აქტივისტებს სცენის დადგმას პარლამენტის კიბეზე სთავაზობდა. როგორც აქტივისტმა ნოდარ რუხაძემ “ნეტგაზეთს” უთხრა, აღნიშნულს აქციის ორგანიზატორები არ დაეთანხმნენ, ვინაიდან კიბის მიმდებარედ კარვებია გაშლილი და ღონისძიების სრულფასოვნად ჩატარება ვერ მოხერხდება.
ხელისუფლების წარმომადგენელთა საჯარო განცხადებების თანახმად, ე.წ. კომენდანტის საათის გაუქმება, ჯერჯერობით, არ იგეგმება. ამ გადაწყვეტილებას ეპიდემიოლოგიური ვითარების ხსნიან.
