ნეტგაზეთი | პოლიცია პარლამენტთან, ტროტუარზე, სცენის მოწყობის საშუალებას არ გვაძლევს — “სირცხვილია” პოლიცია პარლამენტთან, ტროტუარზე, სცენის მოწყობის საშუალებას არ გვაძლევს — “სირცხვილია” – Netgazeti
RU | GE  

პოლიცია პარლამენტთან, ტროტუარზე, სცენის მოწყობის საშუალებას არ გვაძლევს — “სირცხვილია”

მოძრაობა “სირცხვილიას” ინფორმაციით, პოლიცია აქტივისტებს პარლამენტის მიმდებარედ სცენის დადგმის საშუალებას არ აძლევს. 3 აპრილის საღამოს ადგილზე იგეგმება აქცია ე.წ. კომენდანტის საათის გაუქმების მოთხოვნით.

“საუბარი არის ფეხით სავალ ადგილზე, სადაც სცენას ვდგამთ ხოლმე: ან პარლამენტის წინ, ან მოპირდაპირე მხარეს, სადაც სამანქანო მოძრაობას პრობლემა არ შეექმნება. მანდ გვიზღუდავენ სცენის დადგმას”, — უთხრა აქტივისტმა ნოდარ რუხაძემ “ნეტგაზეთს”.

მისივე ინფორმაციით, პოლიცია აქტივისტებს სცენის დადგმას პარლამენტის კიბეზე სთავაზობს. რუხაძის თქმით, აღნიშნულს აქციის ორგანიზატორები არ ეთანხმებიან, ვინაიდან კიბის მიმდებარედ კარვებია გაშლილი და ღონისძიების სრულფასოვნად ჩატარება ვერ მოხერხდება.

დეტალების გასარკვევად “ნეტგაზეთი” შსს-ს დაუკავშირდა. უწყების პასუხს მისი მიღებისთანავე შემოგთავაზებთ.

აქტივისტთა თანახმად, მათ სცენის ტროტუარზე დადგმის უფლებას არ აძლევენ. ფოტო: სირცხვილია

აქტივისტთა თანახმად, მათ სცენის ტროტუარზე დადგმის უფლებას არ აძლევენ. ფოტო: სირცხვილია

აქციის “დაასრულე კომენდანტი!” ორგანიზატორთა თანახმად, ისინი 17:00 საათზე თბილისის სამ სხვადასხვა ადგილას — წითელ ბაღში, ვაკის პარკსა და თბილისის სახელმწიფო უნივერსიტეტთან — შეიკრიბებიან და მოაწყობენ მსვლელობებს.

“მსვლელობები ერთმანეთს შეუერთდება ფილარმონიის მიმდებარე ტერიტორიაზე და საერთო მსვლელობით მივალთ პარლამენტის წინ, 18:00 საათზე.

21:00 საათზე პარლამენტის წინ, კიდევ ერთხელ, დემონსტრაციულად დავარღვევთ კომენდანტის საათს.”, — ნათქვამია განცხადებაში.

ნეტგაზეთის მასალების სხვა გამოცემებში გადაბეჭდვის წესი
ავტორი
მიხეილ გვაძაბია არის ნეტგაზეთის რეპორტიორი 2017 წლის სექტემბრიდან