პრემიერ-მინისტრ გიორგი გახარიას თქმით, დავითგარეჯის საკითხის პოლიტიზება “ნებისმიერი მხარის მიერ”რისკის შემცველია.

“დავითგარეჯის საკითხის ნებისმიერი სახით, ნებისმიერი მხარის მიერ პოლიტიზება არის უაღრესად მაღალი რისკის შემცველი ჩვენი ქვეყნისთვის. ეს იმდენად სენსიტიური საკითხია, ყველას უნდა გვეყოს პასუხისმგებლობა, დაველოდოთ საგამოძიებო პროცესებს, რომელიც მიმდინარეობს. ვერ გამოყოფ ვერავის, საერთო სახელმწიფოებრივი მიდგომა უნდა იყოს ეს — ჩვენ ყველამ თავი შევიკავოთ ნებისმიერი ნაბიბიჯისგან, ნებისმიერი სიტყვისგან, რომელმაც შეიძლება თეორიულადაც კი დავითგარეჯის საკითხის პოლიტიზებას შეუწყოს ხელი”, – განაცხადა გახარიამ იმ კითხვის საპასუხოდ, იზიარებს თუ არა “ქართული ოცნების” დეპუტატების პოზიციას, რომ დავითგარეჯასთან დაკავშირებით ივერი მელაშვილის და სხვების განცხადებები აზიანებს საქართველოს ეროვნულ ინტერესებს.

მისი თქმით, დავითგარეჯის საკითხზე ნებისმიერი სიტყვას გავლენა ექნება საზღვრის დადგენის პროცესზე.

“ჩვენ უნდა გავუფრთხილდეთ გარეჯის მომავალსაც და უნდა გავუფრთხილდეთ ჩვენს სტრატეგიულ პარტნიორ აზერბაიჯანთან ურთიერთობასაც. თითოეულ სიტყვას აქვს არა მხოლოდ პოლიტიკური, ისტორიული ან სოციალური მნიშვნელობა, მას პირდაპირი მნიშვნელობა ექნება იმ პროცესებზე, რომელიც მიმდინარეობს”, – დასძინა პრემიერ-მინისტრმა.

საპარლამენტო უმრავლესობის წევრების თქმით, სხვადასხვა აქტორების მხრიდან განცხადებები, “თითქოს გარეჯი საქართველო არ არის”, საზღვრის დადგენის პროცესში და საერთაშორისო სამართალში შეიძლება, გამოყენებულ იქნას საქართველოს ეროვნული ინტერესების საწინააღმდეგო მტკიცებულებად.

“მთელი პასუხისმგებლობით შემიძლია გითხრათ, დაცვის სტრატეგიად არჩევა ვერსიის, რომ დავითგარეჯა ან მისი ნაწილი არ არის საქართველო, არის მოღალატეობრივი საქციელი”, – განაცხადა ფრაქცია “ქართული ოცნების” თავმჯდომარემ მამუკა მდინარაძემ.

ამ თემაზე:

რა ვიცით დავითგარეჯის პრობლემაზე – მოკლედ და გასაგებად