შსს განცხადებას ავრცელებს კაცზე, რომელიც თბილისში, მას შემდეგ დააკავეს, რაც თავის აფეთქებით დაიმუქრა. უწყების თანახმად, 1991 წელს დაბადებული პირი მუქარისა და იარაღის უკანონო შეძენა-შენახვა ტარების ბრალდებითაა დაკავებული.
განცხადების თანახმად, კაცი ქურდობისთვის პირობითი მსჯავრის ქვეშ იყო.
“გამოძიებით დადგინდა, რომ [კაცმა] რომელიც გლდანის რაიონში, ახლობელთან სტუმრად იმყოფებოდა, სავარაუდოდ, ოჯახური კონფლიქტის ნიადაგზე, თანნაქონი ხელყუმბარის აფეთქებით იმუქრებოდა.
შემთხვევის ადგილზე დაუყოვნებლივ მოხდა სამართალდამცველების მობილიზება. პოლიციელებმა [მასთან] აქტიური მოლაპარაკებების შედეგად შეძლეს სიტუაციის დროულად განმუხტვა და მისი დაკავება”, – ვკითხულობთ განცხადებაში.
დანაშაულის დამტკიცების შემთხვევაში, დაკავებულს 7 წლამდე პატიმრობა ემუქრება.