შინაგან საქმეთა სამინისტროს ინფორმაციით, სამართალდამცავებმა დააკავეს 1988 წელს დაბადებული გ.დ, რომელსაც ბრალად ედება პოლიტიკური პარტია “ლელოს” აქტივისტის ფიზიკური და სიტყვიერი შეურაცხყოფა.

“გამოძიებით დადგინდა, რომ დაკავებულმა, 2020 წლის 4 სექტემბერს, თბილისში, სიტყვიერი და ფიზიკური შეურაცხყოფა მიაყენა ერთ-ერთი პოლიტიკური პარტიის წევრს. გამოძიება ძალადობის ფაქტზე მიმდინარეობს, საქართველოს სისხლის სამართლის კოდექსის 126-ე მუხლის 1 პრიმა მუხლის “ბ” ქვეპუნქტით”, – ნათქვამია შსს-ს 5 სექტემბრის განცხადებაში.

“ლელოს” დიდუბე-ჩუღურეთის რაიონის მაჟორიტარი დეპუტატობის კანდიდატმა ლევან სამუშიამ 4 სექტემბერს თქვა, რომ პარტიის რაიონული ორგანიზაციის წევრს თავს დაესხნენ და სცემეს. დაშავებული გიორგი გლუჩიძე ღუდუშაურის სახელობის კლინიკაში გადაიყვანეს.

როგორც გლუჩიძემ ტვ “პირველს” უთხრა, თავდამსხმელების ამოცნობა შეუძლია: “[მითხრეს] რას დაჰყვები ამ ხაზარაძეს და სამუშიასო. რა გაგიკეთა ამისთანა, რომ ყველა ხაზარაძეს ემხრობაო”.

გლუჩიძის თქმით, თავდამსხმელები მას ამ შელაპარაკების შემდეგ გაუსწორდნენ ფიზიკურად.