ნეტგაზეთი | რურუას გათავისუფლება პრინციპულ საკითხად რჩება – ოპოზიცია რურუას გათავისუფლება პრინციპულ საკითხად რჩება – ოპოზიცია – Netgazeti

რურუას გათავისუფლება პრინციპულ საკითხად რჩება – ოპოზიცია

20-მდე ოპოზიციური პოლიტიკური პარტია ერთობლივ განცხადებას ავრცელებს, რომელშიც საუბრობს პროპორციულთან მიახლოებული საარჩევნო სისტემის მიღებაზე და 8 მარტის შეთანხმების სრულად შესრულებაზე.

პარტიების განცხადებით, “გიორგი რურუას გათავისუფლება პრინციპულ საკითხად რჩება ყველასთვის, ვისთვისაც საქართველოში კანონის უზენაესობა და შერჩევითი სამართლის დაუშვებლობა მნიშვნელოვანი საკითხია”.

განცხადებას უცვლელად გთავაზობთ:

“პოლიტიკური პარტიების, საქართველოს მოქალაქეების, აქტივისტებისა ძალისხმევით და საერთაშორისო მეგობრების დახმარებით, ბიძინა ივანიშვილი იძულებული გახდა თავად მიეღო იმგვარი ცვლილებები, რაც არსებითად პროპორციული არჩევნების ჩატარებას შესაძლებელს ხდის. მადლობა ეკუთვნის თითოეულ მოქალაქეს, აქტივისტთა ჯგუფს, სამოქალაქო მოძრაობებსა და მოლაპარაკებათა ფასილიტატორებს, საქართველოს ყველა მეგობარს, რომლებიც მხარს უჭერენ ამ ცვლილებებს. 

მიუხედავად იმისა, რომ ივანიშვილმა ყველაფერი გააკეთა მისთვის ხელის შესაშლელად, გავრილოვის ღამის შემდეგ დაწყებული დემოკრატიზაციის პროცესმა შედეგი გამოიღო. ეს შედეგი გარანტიაა საქართველოს მოქალაქეებისთვის, რათა ივანიშვილის დამარცხების შემდეგ მოსული ხელისუფლება უკონტროლოდ არ დარჩეს. ბიძინა ივანიშვილმა კომიკურ მდგომარეობაში კიდევ ერთხელ ჩაიგდო თავი, როცა არსებითად პროპორციულ საარჩევნო მოდელზე გადასვლას ოპოზიციაზე გამარჯვებად აცხადებს, საერთაშორისო მეგობრების დახმარებითა და ქართველი ხალხის მტკიცე ნებით მიღწეულ შედეგს კი თავის სურვილს არქმევს. 

8 მარტის შეთანხმება სრულად უნდა შესრულდეს და მართლმსაჯულების პოლიტიკური მიზნებით გამოყენება უნდა შეწყდეს. 

გიორგი რურუას გათავისუფლება პრინციპულ საკითხად რჩება ყველასთვის, ვისთვისაც საქართველოში კანონის უზენაესობა და შერჩევითი სამართლის დაუშვებლობა მნიშვნელოვანი საკითხია. 

აქტიურ სამოქალაქო მოძრაობებთან ერთად, არსებითად პროპორციული არჩევნების მიღწევაში დიდი როლი ითამაშა დემოკრატიული ოპოზიციის ერთიანობამ და მტკიცე პოზიციებმა. ის, თუ როგორ მივაღწიეთ არსებითად პროპორციულ არჩევნებს, მაგალითია მომავალი თანამშრომლობისა და კონსოლიდაციისთვის, რაც აუცილებელია საქართველოს ეკონომიკური თუ პოლიტიკური ჩიხიდან გამოსაყვანად. მიუხედავად ჩვენ შორის არსებული არსებითი განსხვავევებისა, სწორედ ამ პასუხისმგებლობით ვაპირებთ მივუდგეთ მომავალ პოლიტიკურ პროცესს”, – ნათქვამია განცხადებაში, რომელსაც ხელს შემდეგი პარტიები აწერენ.

ევროპული საქართველო

ერთიანი ნაციონალური მოძრაობა

რესპუბლიკური პარტია

ახალი საქართველო

ახალი პოლიტიკური ცენტრი გირჩი

ევროპული დემოკრატები

ქრისტიან კონსერვატიული პარტია

ერთიანი საქართველო-დემოკრატიული მოძრაობა

მოძრაობა სახელმწიფო ხალხისათვის

ემსახურე საქართველოს

ლეიბორისტული პარტია

გამარჯვებული საქართველო

მოძრაობა ლელო საქართველოსთვის

თავისუფალი დემოკრატები

საქართველოს პარლამენტართა საზოგადოება

სამოქალაქო ალიანსი თავისუფლებისათვის

სამართლიანობისთვის

კანონი და სამართალი

ეროვნულ დემოკრატიული პარტია

ნეტგაზეთის მასალების სხვა გამოცემებში გადაბეჭდვის წესი
ავტორი
დათო ქოქოშვილი არის ნეტგაზეთის რედაქტორი 2018 წლის 1 თებერვლიდან. მანამდე ის იყო ნეტგაზეთის რეპორტიორი 2013 წლიდან. Email: davit.qoqoshvili@gmail.com