ნეტგაზეთი | ტრანსპორტში მგზავრს პირბადის გარეშე არ შეუშვებენ ტრანსპორტში მგზავრს პირბადის გარეშე არ შეუშვებენ – Netgazeti

ტრანსპორტში მგზავრს პირბადის გარეშე არ შეუშვებენ

ავტობუსებსა და მეტროში პირბადის გარეშე მგზავრები არ დაიშვებიან. ამის შესახებ “ნეტგაზეთს” თბილისის სატრანსპორტო კომპანიაში განუცხადეს.

კომპანიის ცნობით, საკოორდინაციო საბჭოს რეკომენდაციის შესაბამისად, მგზავრები ვალდებული იქნებიან,  ეკეთოთ პირბადე. ავტობუსების შემთხვევაში ამას გააკონტროლებს მონიტორინგის სამსახური კონდუქტორების სახით, გაჩერებებზე კი კონტროლიორები შეამოწმებენ, რომ მგზავრი პირბადით ავიდეს ავტობუსში. მეტროსადგურებში კი მგზავრებს საპატრულო პოლიციის თანამშრომლები შეამოწმებენ.  პირბადის გარეშე მგზავრები საზოგადოებრივ ტრანსპორტში არ დაიშვებიან.

რაც შეეხება მიკროავტობუსებს, “თბილისის მიკროავტუბისის” განმარტებით, ადამიანები, რომლებსაც პირბადე არ ეკეთებათ, სამარშრუტო ტაქსიში ვერ ავლენ. ამას მიკროავტობუსის მძღოლები და მონიტორინგის სამსახურის წარმომადგენლები ერთობლივად გააკონტროლებენ.

ამასთან, ავტობუსებში უქმდება მძღოლთან მდებარე წინა კარი და იკრძალება კონდიციონერის ჩართვა. კონდიციონერის ჩართვა იკრძალება სამარშრუტო ტაქსებშიც, სადაც ასევე მგზავრებისთვის ფეხზე დგომაც არ შეიძლება.

ყველა სახის მუნიციპალური ტრანსპორტით გადაადგილება ხვალიდან, 29 მაისიდან გახდება შესაძლებელი.

29 მაისიდან მუნიციპალური ტრანსპორტი ამუშავდება, მათ შორის, მეტროც – გახარია

ნეტგაზეთის მასალების სხვა გამოცემებში გადაბეჭდვის წესი
ავტორი