ნეტგაზეთი | ტრამპი: „ბერნის ხალხი რესპუბლიკურ პარტიაში უნდა მოვიდეს“ ტრამპი: „ბერნის ხალხი რესპუბლიკურ პარტიაში უნდა მოვიდეს“ – Netgazeti

ტრამპი: „ბერნის ხალხი რესპუბლიკურ პარტიაში უნდა მოვიდეს“

აშშ-ის პრეზიდენტი დონალდ ტრამპი გამოეხმაურა ბერნი სანდერსის გამოთიშვას საპრეზიდენტო მარათონიდან და სანდერსის მხარდამჭერებს მოუწოდა, რესპუბლიკურ პარტიას დაუჭირონ მხარი.

ბერნი სანდერსმა 8 აპრილს გამოაცხადა, რომ პრეზიდენტობისთვის ბრძოლას წყვეტს. ტრამპმა ტვიტერზე დაწერა:

„ბერნი სანდერსი [პრეზიდენტის არჩევნებს] გამოეთიშა. მადლობა ელიზაბეტ უორენს [დემოკრატების ერთ-ერთი კანდიდატი]. ის რომ არა, ბერნი „სუპერ სამშაბათს“ თითქმის ყველა შტატში გაიმარჯვებდა“, – დაწერა ტრამპმა.

„ყველაფერი ზუსტად ისე დასრულდა, როგორც დემოკრატებსა და დემოკრატიული პარტიის ეროვნულ კომიტეტს სურდათ“, – დაწერა პრეზიდეტნმა.

მან ბერნი სანდერსის მხარდამჭერებს მოუწოდა, რესპუბლიკურ პარტიას დაუჭირონ მხარი: „ბერნის ხალხი „რესპუბლიკურ პარტიას“ უნდა შემოუერთდეს“, – დაწერა დონალდ ტრამპმა ტვიტერზე.

ბერნი სანდერსმა 2020 წლის პრაიმერი ერთ-ერთი ფავორიტის სტატუსით დაიწყო და პირველ სამ პრაიმერში კარგი შედეგიც აჩვენა, თუმცა მას შემდეგ, რაც ბევრი სხვა კანდიდატი პრაიმერს ბაიდენის სასარგებლოდ გამოეთიშა, ყოფილმა ვიცე-პრეზიდენტმა დამაჯერებელი გამარჯვებების მოპოვება დაიწყო და ფავორიტის სტატუსიც მოიპოვა.

სანდერსის გადაწყვეტილების შემდეგ საპრეზიდენტო არჩევნებში დემოკრატების კანდიდატობის პრეტენდენტია ყოფილი ვიცე-პრეზიდენტი ჯო ბაიდენი.

CNN-ისა და NBC News-ის ცნობით, სანდერსს არ დაუკონკრეტებია, დაუჭერს თუ არა მხარს ჯო ბაიდენის კანდიდატურას.

ბერნი სანდერსი 2016 წლის პრაიმერშიც იღებდა მონაწილეობას. მაშინ ის ჰილარი კლინტონთან დამარცხდა. მას ხშირად უწოდებენ აშშ-ის მემარცხენე ფრთის წარმომადგენელსა და ლიდერს, საკუთარ თავს კი დემოკრატიულ სოციალისტად მოიხსენიებს.

აშშ-ში საპრეზიდენტო არჩევნები მიმდინარე  წლის 3 ნოემბერს უნდა ჩატარდეს.

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com