ნეტგაზეთი | გახარია: ორ დღეში შემოწმდეს კლინიკების სრული მზაობა გახარია: ორ დღეში შემოწმდეს კლინიკების სრული მზაობა – Netgazeti

გახარია: ორ დღეში შემოწმდეს კლინიკების სრული მზაობა

პრემიერ-მინისტრმა გიორგი გახარიამ ჯანდაცვის სამინისტროს დაავალა:

  1. ორ დღეში შეამოწმოს, რამდენად მზად არიან ჰოსპიტალური სექტორის ძირითადი კლინიკები მოსალოდნელ სიტუაციასთან გასამკლავებლად
  2. დღესვე დეტალურად გაარკვიოს, რამდენად მზად არიან სოფლის და ოჯახის ექიმები — ჯამში, 3200-მდე ადამიანი — პანდემიასთან საბრძოლველად.
რამდენად მზადაა ჰოსპიტალური სექტორი?

3 აპრილის დილას საქართველოში კორონავირუსით ინფიცირების 18 ახალი შემთხვევა დადასტურდა (ერთ დღეში ეს მატების ყველაზე მაღალი მაჩვენებელია საქართველოში), წინა დღით — 15.

გახარიამ იმავე დილას საკოორდინაციო საბჭოს სხდომაზე განაცხადა, რომ „სიტუაცია, გარდა იმისა, რომ მძიმდება, [დაინფიცირებულთა რაოდენობის ზრდის] ტემპიც სულ უფრო და უფრო სწრაფი ხდება“.

შესაბამისად, გახარიას თანახმად, „დღეს ჩვენ ერთმნიშვნელოვნად ვხედავთ, რომ ძირითადი დატვირთვა გადადის ჯანდაცვის სამინისტროსა და ჰოსპიტალურ სექტორზე“.

[გირჩევთ, წაიკითხოთ: როდესაც გვაქვს შიდა გადაცემა, დღეში 18-20 პაციენტი ტრაგედია არაა – მარინა ეზუგბაია]

ამის გათვალისწინებით, პრემიერ-მინისტრმა განაცხადა: „ჯანდაცვის სამინისტრომ დღეს მიიღო დავალება — ჰოსპიტალური სექტორის ძირითადი კლინიკების სრული მზაობის შემოწმება“. მისი თქმით, ეს დავალება 2 დღეში უნდა შესრულდეს.

„საერთაშორისო ფონდმა კურაციომ“, რომელიც ჯანდაცვის სფეროს იკვლევს, 27 მარტს გამოაქვეყნა დოკუმენტი, „COVID-19 ეპიდემია საქართველოში, პროგნოზი და პოლიტიკის შეთავაზებები“, რომელიც ჯანდაცვის სამინისტროსთვის მომზადდა. ამ დოკუმენტის თანახმად:

თუკი მოსახლეობამ არ დაიცვა სოციალური დისტანცირების რეკომენდაციები და კონტაქტების რაოდენობა არ შეამცირა, ასეთ შემთხვევაში:

  • საქართველომ შესაძლოა ძალიან მალე, სულ რაღაც მე-11 კვირაში (ანუ მაისის მეორე კვირაში) მიაღწიოს ეპიდემიის პიკს;
  • პიკურ კვირაში ახალი ჰოსპიტალური შემთხვევების რაოდენობა 5950 შეიძლება იყოს, რასაც ქვეყნის ჯანდაცვის სისტემა ვერ გაუძლებს;
რამდენად მზად არიან ექიმები?

მეორე დავალება, რაც ჯანდაცვის სამინისტრომ პრემიერისგან მიიღო, შემდეგია: „დღეს დეტალებში რომ მოგვახსენოთ პირველადი ჯანდაცვის … ვირუსთან ბრძოლის მზაობა“.

გიორგი გახარიას თანახმად, მას აინტერესებს, თუ რამდენად მზად არიან სოფლის ექიმები და ოჯახის ექიმები მზად ცხელებასთან გამოწვეულ პრობლემებთან გასამკლავებლად:

„სოფლის ექიმები გვყავს 1200 ადამიანი, ოჯახის ექიმი — 2000 ადამიანი. სად არის ეს ხალხი, რას აკეთებენ, რამდენად არიან მზად, ეს ინფორმაცია [რომ მოგვაწოდოთ]“.

„პირველ რიგში, ამ ადამიანების ტრენინგები და მათი მზაობა, ცხელებისგან გამოწვეული პრობლემების გამკლავებაში. ეს უკიდურესად მნიშვნელოვანია, რადგან ეს არის ერთადერთი დაზღვევა, რომელსაც შეუძლია ჯანდაცვის სისტემაზე, ჰოსპიტალურ სისტემაზე ზეწოლა შეამსუბუქოს“, – განაცხადა პრემიერ-მინისტრმა.


3 აპრილის დილის მონაცემებით საქართველოში კორონავირუსის დადასტურებული შემთხვევები 148-მდე გაიზარდა. 27 პაციენტი გამოჯანმრთელდა. კარანტინის რეჟიმში იმყოფება 5550, ხოლო სტაციონარში მეთვალყურეობის ქვეშ – 281 ადამიანი.

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია - „ნეტგაზეთის“ რეპორტიორი 2018 წლის სექტემბრიდან. მობ.: 995 555 223 568; ელ-ფოსტა: lukapertaia@gmail.com