ევრონესტი ექიმ ვაჟა გაფრინდაშვილის დაუყოვნებლივ გათავისუფლებას ითხოვს

ევრონესტის საპარლამენტო ასამბლეის ბიურომ ექიმ ვაჟა გაფრინდაშილის გათავისუფლების მოთხოვნით განცხადება მიიღო.

ევრონესტის საპარლამენტო ასამბლეა გმობს ექიმ ვაჟა გაფრინდაშვილის უკანონო დაკავებას და მოუწოდებს მისი დაუყოვნებლივ გათავისუფლებისკენ.

“ასამბლეა მოუწოდებს საერთაშორისო საზოგადოებას, გამოიყენოს ყველა მშვიდობიანი ზომა ექიმ ვაჟა გაფრინდაშვილის ოკუპირებული ცხინვალის რეგიონიდან გასათავისუფლებად”, – ნათქვამია განცხადებაში.

ევრონესტის საპარლამენტო ასამბლეა ადასტურებს თავის სრულ მხარდაჭერას საქართველოს ტერიტორიული მთლიანობისა და სუვერენიტეტისადმი.


ევრონესტის საპარლამენტო ასამბლეა აღმოსავლეთ პარტნიორობის პოლიტიკის საპარლამენტო ინსტიტუტია, რომელიც ევროპარლამენტისა (60 წევრი) და აღმოსავლეთ ევროპული ქვეყნების საპარლამენტო დელეგაციებისგან (10 წევრი თითოეული ეროვნული პარლამენტიდან: აზერბაიჯანი, სომხეთი, საქართველო, მოლდოვა, უკრაინა (ბელარუსის მონაწილეობა დროებით შეჩერებულია) შედგება. ასამბლეა 2011 წლის 3 მაისს ბრიუსელში დაფუძნდა. დამფუძნებელ აქტს სომხეთის, აზერბაიჯანის, საქართველოს, მოლდოვას, უკრაინის პრეზიდენტებმა და ევროპარლამენტის წევრებმა მოაწერეს ხელი.

ნეტგაზეთის მასალების სხვა გამოცემებში გადაბეჭდვის წესი
ავტორი
ნინო ჩიჩუა არის "ნეტგაზეთის" რეპორტიორი 2018 წლის სექტემბრიდან.