17 მოწმის დაკითხვის შემდეგ დემოკრატებმა ტრამპის იმპიჩმენტის კონკრეტული საფუძვლები დაასახელეს

დონალდ ტრამპის იმპიჩმენტის პროცესის ფარგლებში, დემოკრატიული პარტიის წარმომადგენლებმა აშშ-ის კონგრესში პრეზიდენტის იმპიჩმენტის შესახებ მოხსენება გამოაქვეყნეს და ტრამპი დაადანაშაულეს „აშშ-ის საპრეზიდენტო არჩევნების პროცესისა და ხელშეუეხებლობის ძირის გამოთხრაში“.

როგორც CBS News წერს, დემოკრატების მოხსენება დაფუძნებულია ბოლო ორი თვის განმავლობაში შემდგარი 17 მოწმის დაახლოებით 130-საათიან ჩვენებებზე. მოხსენება შეიცავს 300 გვერდს და დაწერილია წარმომადგენელთა პალატის სადაზვერვო, საგარეო საქმეთა და საზედამხედველო კომიტეტების წევრების ადმინისტრაციის მიერ.

მოხსენებაში წარმოდგენილია ტრამპის მიერ კანონმდებლობის სავარაუდო დარღვევის რამდენიმე ფაქტი:

  1. პრეზიდენტმა „სთხოვა უცხოურ ქვეყანას, უკრაინას, 2020 წლის საპრეზიდენტო არჩევნებში ჩარევა“ და სცადა „აშშ-ის საპრეზიდენტო არჩევნების პროცესისა და ხელშეუეხებლობის ძირის გამოთხრა“;
  2. პრეზიდენტს სურდა, საკუთარი პოლიტიკური მიზნებისთვის „ზეწოლა მოეხდინა უკრაინის ახლად არჩეულ პრეზიდენტ ვოლოდიმირ ზელენსკიზე, რათა უკანასკნელს საჯაროდ გამოეცხადებინა [ჯო ბაიდენის შვილის წინააღმდეგ] გამოძიებაზე“;
  3. „პრეზიდენტმა ტრამპმა გასცა ბრძანება, შეეჩერებინათ 391 მილიონი დოლარის აუცილებელი სამხედრო დახმარება“ უკრაინისთვის „ლეგიტიმური საგარეო პოლიტიკური, ეროვნული უსაფრთხოების თუ ანტიკორუფციული გამართლების გარეშე“;
  4. „თავისი მოქმედებების გამოვლინების შემდეგ პრეზიდენტმა ტრამპმა საჯაროდ და არაერთხელ სთხოვა უცხოურ ქვეყნებს, მათ შორის ჩინეთსა და უკრაინას, მისი პოლიტიკური ოპონენტის წინააღმდეგ გამოძიება დაეწყოთ“;
  5. „პრეზიდენტმა ტრამპმა დაგეგმა და ბრძანება გასცა, დაეწყოთ კამპანია, რომლის ფარგლებშიც მისი მოქმედებები დამალული უნდა ყოფილიყო საზოგადოებისთვის, ხოლო წარმომადგენელთა პალატის იმპიჩმენტის პროცესისთვის ხელი უნდა შეეშალათ“.
ნეტგაზეთის მასალების სხვა გამოცემებში გადაბეჭდვის წესი
ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.