მთავრობის ადმინისტრაციის ცნობით, ირაკლი ღარიბაშვილის სამუშაო ვიზიტი რიგაში ევროკავშირის საბჭოს პრეზიდენტსა და ქვეყნის პირველ პირთან შეხვედრით დაიწყო. საქართველოს მთავრობის მეთაურს ანდრის ბერზინშმა ლატვიის პრეზიდენტის სასახლეში უმასპინძლა.
ლატვია მხარს უჭერს საქართველოს ევროპული ინტეგრაციის გზაზე, – მხარდაჭერა საქართველოს პრემიერ-მინისტრს ლატვიის რესპუბლიკის პრეზიდენტმა ანდრის ბერზინშმა დღეს კიდევ ერთხელ დაუდასტურა, აცხადებს საქართველოს მთავრობა.
რიგის „აღმოსავლეთ პარტნიორობის“ სამიტი, სამეზობლო პოლიტიკის მომავალი, საქართველოს ევროპული მისწრაფებები და ლატვიასთან ორმხრივი ურთიერთობის გაღრმავება საუბრის მთავარი თემები იყო.
ირაკლი ღარიბაშვილმა ანდრის ბერზინშს მადლობა გადაუხადა და ხაზი გაუსვა მის განსაკუთრებულ წვლილს, როგორც საქართველოს ევროპული ინტეგრაციის, ასევე, ტერიტორიული მთლიანობის მხარდაჭერის მიმართულებით.
მხარეებმა ასევე ისაუბრეს საქართველოსა და ლატვიას შორის სავაჭრო-ეკონომიკური ურთიერთობების გაღრმავების შესახებ და აღნიშნეს, რომ 2015 წლის იანვარი-მარტის მონაცემებით, ორ ქვეყანას შორის სავაჭრო ბრუნვა 2014 წლის ანალოგიური პერიოდის მაჩვენებელთან შედარებით 19%-ით გაიზარდა.
ირაკლი ღარიბაშვილმა მზადყოფნა გამოთქვა, რომ საქართველომ 2015 წელს უმასპინძლოს ორი ქვეყნის მთავრობათაშორისი ეკონომიკური კომისიის სხდომას, რაც სავაჭრო-ეკონომიკური ურთიერთობების გაფართოებას შეუწყობს ხელს.
