ასეთი განცხადებები ზურგის და მისი ინტერესების გარეშე არ კეთდება – მარგველაშვილი პეტრეზე

სინოდის 31 ოქტომბრის სხდომის შემდეგ, საღამოს, გიორგი მარგველაშვილი პატრიარქ ილია II-ს შეხვდა საპატრიარქოში, რის შემდეგაც ჟურნალისტებს განუცხადა, რომ მიტროპოლიტ პეტრე ცაავას მიერ გაკეთებული მსგავსი განცხადებები „ზურგის“ გარეშე არ კეთდება.

„მე დავინახე ის თვალები, რომელიც ბოლო 40 წელია მე მახსოვს ნათელი ადამიანისა, რომელიც ვერ გატეხა ვერც „კაგებემ“ და ვერც სხვა სპეცსამსახურებმა“, — უთხრა მან ჟურნალისტებს პატრიარქთან შეხვედრიდან გამოსვლის შემდეგ. პეტრე ცაავასთან დაკავშირებით კითხვაზე კი განაცხადა:

„მე, ბუნებრივია, არ ვაპირებ მეუფეების განცხადებების, შენიშვნების, კომენტარების ანალიზს, ერთადერთი რამე შემიძლია გითხრათ, რომ როდესაც ასეთი ტიპის განცხადებები კეთდება, ეს განცხადებები არცერთ შემთხვევაში არ კეთდება ელემენტარული გულწრფელი გაბრაზებით ან აღშფოთებით. არ ხდება ხოლმე ასეთი ტიპის განცხადებების გაკეთება ზურგისა და ამ ზურგის ინტერესების გარეშე. დანარჩენი, ახლა, ანალიზს [არ დავიწყებ]“.

კითხვაზე, ვის გულისხმობდა ამ „ზურგში“, მან უპასუხა: „ვერ გეტყვით, არ ვარ ამის თაობაზე ინფორმირებული“.

სინოდის 31 ოქტომბრის სხდომიდან გამოსვლის შემდეგ სტატუსშეჩერებულმა მიტროპოლიტმა პეტრე ცაავამ კათალიკოს-პატრიარქ ილია II-ის ჰომოსექსუალობასა და პედოფილიაზე ისაუბრა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია 2018 წლის 1 სექტემბრიდან არის ნეტგაზეთის რეპორტიორი. ის ადრეც მუშაობდა ნეტგაზეთში — 2016 წლის მაისიდან 2017 წლის თებერვლამდე. Email: lukapertaia@gmail.com