სტეპანაკერტის ერთადერთი მოქმედი წმინდა აკოფის სახელობის ეკლესია 2005 წელს კალიფორნიის შტატში მცხოვრებმა ეფრემიანების ოჯახმა ააშენა. ქველმოქმედმა ვაჩე ეფრემიანმა ეკლესია დაღუპული ძმის, აკოფ ეფრემიანის საპატივსაცემოდ ააშენა. 

“ქალაქის ერთ ნაწილში ამერიკელი ქველმოქმედების მიერ აშენებული ეკლესია არასოდესაა ცარიელი. სტუდენტებიც კი მოდიან და ღმერთს გამოცდაზე კარგ ნიშნებს სთხოვენ. ეს ნიშნავს იმას, რომ ყარაბაღი ღმერთს დაუბრუნდა”, –  წერს ჟურნალისტი აირა აირუმიანი თავის ჩანაწერებში. 

ეკლესიები, როგორც სტეპანაკერტში, ასევე მთელ ყარაბაღში, საბჭოთა კავშირის  პერიოდში დაანგრიეს ან ხორბლის შესანახ სათავსოებად გადააკეთეს. საეკლესიო რიტუალებიც, გარკვეულ შემთხვევებში, სწორედ ამ სათავსოებში მიმდინარეობდა.

“1986 წელს პირველად ვნახე “ნამდვილი” მღვდელი, როდესაც ექსკურსიაზე ეჩმიაძინში ჩავედი. იქამდე ეკლესია რაღაც არარსებული რამ მეგონა. ყარაბაღში ბოლო ეკლესიის კარი მეოცე საუკუნის 30-იან წლებში დაიხურა. დედაჩემი კარადაში ინახავდა ხოლმე კათოლიკოს ვაზგენ პირველის პორტრეტს”, – წერს აირუმიანი.

ყარაბაღის დედაქალაქში დღეს ეკლესიაზე დიდი მოთხოვნაა. 2002 წელს სომხეთის კათოლიკოსის, გარეგინ მეორის კურთხევით, აქ ღვთისმშობლის სახელობის ეკლესიის მშენებლობა დაიწყო. თუმცა მისი მშენებლობა ჯერ არ დასრულებულა. ეკლესიას კერძო შემოწირულობებით აშენებენ.  მშენებლობაზე დასაქმებული ვალო ამბობს, რომ ამის მიუხედვად, ხელფასს ყოველთვის დროულად უხდიან.  

სომხეთის სამოციქულო ეკლესიამ 5 აპრილს აღდგომა აღნიშნა. საეკლესიო ლიტურგიის პარალელურად, ქალაქში კონცერტი გაიმართა. 

მშენებარე ეკლესია, რომელსაც საფუძველი 2002 წელს ჩაუყარეს.

დამატებითი სამლოცველო ეკლესიის გარეთ.

თეატრის შენობა, რომელიც საბჭოთა კავშირის პერიოდში ეკლესიის ნაცვლად ააშენეს.

წმინდა აკოფის სახელობის ეკლესია სტეპანაკერტში