მარეკ დუდაევის მკვლელი ცხინვალის ციხეში გარდაიცვალა – ოსური მედია

ოსური მედიის ინფორმაციით, 2018 წლის იანვარში დე ფაქტო სამხრეთ ოსეთის ტერიტორიაზე მოკლული მარეკ დუდაევის  33 წლის მკვლელი, ვიაჩესლავ კაზიევი ცხინვალის ციხეში დღეს, პირველ ოქტომბერს, სავარაუდოდ, თრომბოემბოლიით გარდაიცვალა.

მარეკ დუდაევი 2018 წლის იანვარში სოფელ არცევში სამი გასროლით მოკლეს.

დუდაევი, რომელსაც თბილისის საქალაქო სასამართლომ 23-წლიანი პატიმრობა შეუფარდა 2005 წელს, 2013-ში გათავისუფლდა.

მარეკ დუდაევი

ცხინვალში მცხოვრები მარეკ დუდაევი ქართველმა სამართალდამცავებმა 2004 წელს დააკავეს, რის შემდეგაც სასამართლომ დამნაშავედ ცნო მკვლელობაში, ყაჩაღობასა და ფულის გამოძალვაში. მისთვის დაკისრებული სასჯელი უცვლელი დატოვა საქართველოს სასამართლოს ყველა ინსტანციამ. სამართალდამცავების განცხადებითვე, ის ”კრიმინალური ავტორიტეტი” იყო.

მარეკ დუდაევი ბრალს არ აღიარებდა და მის დაკავებას ქართული მხარის პროვოკაციად აფასებდა. როგორც civil.ge წერს, საქართველოს შინაგან საქმეთა მინისტრმა 2005 წლის ნოემბერში განაცხადა, რომ მარეკ დუდაევის ძმა ერიკი, რომელიც სამხრეთ ოსეთის თვითგამოცხადებული რესპუბლიკის თავდაცვის სამინისტროში მსახურობს, ასევე კრიმინალური ავტორიტეტია და ადამიანთა გატაცებებში, ფულის გამოძალვაში და სხვა კრიმინალურ საქმიანობაშია ჩართული.

მარეკ დუდაევის დაპატიმრებაზე საგამოძიებო ფილმი მისი დაკავების შემდეგ მოამზადა ჟურნალისტმა ვახტანგ კომახიძემ, სადაც საუბარი იყო მარეკ დუდაევის საქმეში არსებულ შეუსაბამობებზე.

საქმეში არსებულ ხარვეზებზე 2013 წლის თებერვალში ისაუბრა საქართველოს სახალხო დამცველმა უჩა ნანუაშვილმაც, რომელმაც განაცხადა, რომ კარგი იქნება, თუ სახელმწიფო ჰუმანიტარული მოსაზრებებით ქართულ საპატიმროებში მყოფ ცხინვალელ პატიმრებს, მათ შორის მარეკ დუდაევს, დე ფაქტო სამხრეთ ოსეთის ხელისუფლებას გაუცვლის ცხინვალის ციხეში მყოფ ქართველ ტყვეებში.

 

ნეტგაზეთის მასალების სხვა გამოცემებში გადაბეჭდვის წესი
ავტორი