“გამოძიებამ თავიდანვე იცოდა, რომ დნმ-ის კვალი აღმოაჩინეს. ვისი კვალი იყო, ეს არ ვიცოდით. ამ მიმართულებით ჩატარდა არაერთი საგამოძიებო და ოპერატიულ-სამძებრო ღონისძიება. სოსანაშვილამდე შემოწმებული იყვნენ სხვა მოქალაქეებიც დნმ-ის შესაბამისობაზე. სასაფლაოზე შემთხვევის ადგილის დათვალიერებისას აღმოჩენილია სხვა DNM-ის კვალიც”, – ამბობ ირაკლი შოთაძე.
მთავარი პროკურორის მოადგილის განცხადებით, გამოძიება გრძელდება და ამ ეტაპზე დამატებით ინფორმაციას ვერ გასცემს.
იური ვაზაგაშვილის მკვლელობის ბრალდებით, დაკავებულია ყოფილი პოლიციელი გია სოსანაშვილი, რომელსაც თბილისის საქალაქო სასამართლომ 9 თებერვალს წინასწარი პატიმრობა შეუფარდა.
იური ვაზგააშვილი წლების მანძილზე იბრძოდა 2006 წლის 2 მაისს სპეცოპერაციის შედეგად მოკლული შვილის – ზურა ვაზაგაშვილის მკვლელობის საქმის გამოძიებისა და დამნაშავეების დასჯისთვის. იგი 2015 წლის 20 იანვარს კასპის რაიონის სოფელ ყარაფილაში სწორედ მისი შვილის საფლავზე დამონტაჟებული ასაფეთქებელი მოწყობილობის აფეთქების შედეგად ადგილზე გარდაიცვალა.
2015 წლის 8 თებერვალს პროკურატურამ იური ვაზაგაშვილის მკვლელობისთვის გია სოსანაშვილს ბრალი სსკ 109-ე (განზრახ მკვლელობა დამამძიმელ გარემოებაში) და 236-ე მუხლებით (საბრძოლო მასალის მართლსაწინაღმდეგო შეძენა, შენახვა, ტარება) წარედგინა.
პროკურატურის ცნობით, გამოძიებამ შემთხვევის ადგილის დათვალიერებისას ამოიღო საფლავზე აფეთქებული ხელყუმბარის ნაწილი ე.წ. „ფალიის სახელური“, რომელზედაც ჩატარებული ექსპერტიზით სოსანაშვილის დნმ-ის კვალი აღმოაჩინეს.
თავად სოსანაშვილი ბრალს არ აღიარებს. ბრალის დადასტურების შემთხვევაში სოსანაშვილს 11-დან 14 წლამდე თავისუფლების აღკვეთა ემუქრება.