“ვაზაგაშვილის სპეცოპერაციაში ძალიან ბევრი ხალხი მონაწილეობდა. შეიძლება 50-100 კაცი, მაგრამ ყველას ვერ გავუშვებთ მომენტალურად სამსახურიდან. ყველას ბრალი ხომ არ იყო. იქ იყო რამდენიმე კაცის ბრალი. პრობლემა რომ არ შექმნოდა გამოძიებას და არ შეშლოდა ხელი, რამდენიმე მაღალჩინოსანმა დატოვა თანამდებობა. დამთავრდება გამოძიება, გამოიკვეთება ბრალეულობა და არ არის გამორიცხული, რომ ეს ადამიანები, თუ არაფერ შუაში არ არიან, ისევ აღდგნენ სამსახურებში” -ეს კომენტარი ვახტანგ გომელაურმა დღეს სამების ეზოს ტაძარში იური ვაზაგაშვილის სამოქალაქო პანაშვიდიდან გამოსვლის შემდეგ გააკეთა.
შინაგან საქმეთა მინისტრმა ალექსანდრე ჭიკაიძემ გადადგომის თხოვნით პრემიერ-მინისტრ ირაკლი ღარიბაშვილს 23 იანვარს მიმართა. განცხადებაში ნათქვამია, რომ აღნიშნული გადაწყვეტილება ბოლო დროს გახმიანებულმა ბრალდებებმა განაპირობა, რომლის თანახმადაც ჭიკაიძე აფარებს ხელს ზურა ვაზაგაშვილის მკვლელობაში მონაწილე პირებს.
ზურაბ ვაზაგაშვილის მამა იური ვაზაგაშვილი 2012 წლის საპარლამენტო არჩევნების შემდეგ ახალი ხელისუფლებისგან მისი შვილის მკვლელობის ხელახალ გამოძიებას ითხოვდა, ამ მოთხოვნით 2013 წელს იუსტიციის სახლის წინ აქციაც გაიმართა.
