დღეს, 27 ივნისს, შს მინისტრი გიორგი გახარია რამდენიმე ტელეწამყვანს შეხვდა და მათ კითხვებს უპასუხა. კითხვების უმეტესობა 20 ივნისის აქციის დარბევას ეხებოდა. გახარიამ შეხვედრაზე განაცხადა, რომ სამართალდამცველების მხრიდან ძალის გამოყენება ლეგიტიმური იყო , მისივე თქმით, ყველაფერი, რაც ამ ღონისძიების დროს მოხდა, მისი პასუხისმგებლობაა. თუმცა გახარიამ არ უპასუხა კონკრეტულ კითხვას პასუხი, ვინ გასცა აქციის დარბევისა და რეზინის ტყვიების სროლის ბრძანება.
ამის შემდეგ, “კავკასიის“ ჟურნალისტმა მერაბ მეტრეველმა კითხვის დასმის დროს 20 ივნისი შეადარა 9 აპრილს, 7 ნოემბერსა და 26 მაისს. მეტრეველმა გახარიას ჰკითხა, აქვს თუ არა მას პოლიტიკური პასუხისმგებლობის გრძნობა იმისთვის, რომ თანამდებობიდან გადადგეს.
მეტრეველი: მე მეჩვენება, რომ ჩვენ სხვადასხვა ენაზე ვსაუბრობთ, ბატონო მინისტრო. ვერ ვხვდებით, რაზე არის საუბარი. თქვენ საუბრობთ სამართლებრივ საკითხზე, რაზეც ჩვენ არ შემოვდივართ კამათში, ჩვენ კი ვსაუბრობთ უბრალოდ პოლიტიკურ პასუხისმგებლობაზე და პოლიტიკური პასუხისმგებლობის გრძნობაზე: აქვს ის პოლიტიკოსს თუ არ აქვს ის პოლიტიკოსს – ამაზე ვსაუბრობთ. ჩვენ ბევრი მიტინგის დარბევა გვინახავს 9 აპრილიდან მოყოლებული და სახელმწიფოს მხრიდან ყოველთვის ერთი და იგივე გვესმოდა. მაშინ საბჭოთა კავშირი იყო და გვეუბნებოდა, რომ მომიტინგეებისა და მათი ლიდერების პასუხისმგებლობაა, მაშინ არაფორმალებს ეძახდნენ მათ.
გვინახავს მიხეილ სააკაშვილის მიერ მიტინგის დარბევა 7 ნოემბერს და ამ დღეებში სოციალურ ქსელში “ოცნების“ წევრებმა გაავრცელეს გიგა ბოკერიას მაშინდელი ინტერვიუ, სადაც ის ზუსტად იგივეს ამბობს, რომ აი, მომიტინგეები გადმოვიდნენ შეტევაზე, ცემდნენ პოლიციელებს, ზუსტად თქვენი სიტყვები, რასაც ამბობთ… მთელი დღეების განმავლობაში იყო ქვების სროლა და სწორედ ამიტომ, ეს ძალა იყო ლეგიტიმური.
ჩვენ გვახსოვს 26 მაისი, როცა გვეუბნებოდნენ, რომ “პოლიციელებს სხვა რა უნდა ექნათ?!“ და სხვათა შორის, თქვენ ამბობთ, რომ პოლიციელები გამოათრიეს და, რა თქმა უნდა, გამოათრიეს და მე გეთანხმებით, რომ პოლიციელზე თავდასხმა არ შეიძლება, იმაშიც გეთანხმებით, რომ პარლამენტზე თავდასხმა არ შეილება, მაგრამ ნუ გვავიწყდება, რომ 26 მაისს პოლიციელი მოკლეს, ბატონო მინისტრო. ესკორტმა გადაუარა და მოკლეს. მაშინ, გამოდის, რომ 26 მაისსაც ყველაფერი ლეგიტიმური ყოფილა, რისთვის ზის ის მინისტრი ციხეში, ხომ? მაშინ არ გადადგა ვანო მერაბიშვილი, მაშინ რომ გადამდგარიყო, შეიძლება ახლა ის ციხეში არ მჯდარიყო. მე არ მინდა პარალელების გავლება, მე უბრალოდ გესაუბრებით პოლიტიკური პასუხისმგებლობაზე. ჩვენ გვაქვს დეჟავუ.
მე და დიანა [ტრაპაიძე] ვიყავით ტელეკომპანია “იმედში“, როცა შემოგვივარდა სპეცრაზმი და ზუსტად იგივეს გვეუბნებოდნენ, რომ სახელმწიფო გადატრიალებას აწყობთ და ყველანი თურმე სახლემწიფო გადატრიალებას ვაწყობდით. სახელმწიფო ინსტიტუტები, რა თქმა უნდა, უნდა დავიცვათ, მაგრამ აქვს მნიშვნელობა, თუ როგორ მოხდება ეს.
თქვენ თავად აღიარეთ, რომ შეიძლება იქ გადაცდომა ყოფილიყო და ეს გამოძიებამ უნდა დაადგინოსო. თუ ეს ყველაფერი ასეა, თქვენ პოლიტიკური პასუხისმგებლობა არ უნდა აიღოთ იმაზე, რომ ოპერაცია დასრულდა ასეთი შედეგით? თქვენ რამდენჯერმე ახსენეთ სიტყვა “ტრაგიკული“ და მე იმედი მაქვს, რომ ეს ოპერაცია მართლაც არ აღმოჩნდება ტრაგიკული და ვინმე არ გარდაიცვლება და ის ადამიანები გამოჯანმრთელდებიან, მაგრამ როდესაც ასეთი შედეგით სრულდება… თუ იქ კონკრეტულმა პოლიციელმა… ორ პოლიციელზე საქმე აღძარით, თუ ორმა პოლიციელმა გადააჭარბა თავის უფლებამოსილებას, 10 პოლიციელს შევუჩერეთო – ეს არის თუ არა თქვენი პოლიტიკური პასუხისმგებლობა.
თქვენ ამბობთ, რომ უნდა დაიცვათ პოლიცია და აარიდოთ რაღაც ბულინგს – მე არ მინახავს არც მიტინგზე და არც არსად, ვინმე პოლიციელს აგინებდეს. ყველა კრიტიკა თქვენკენ არის მომართული. თუ თქვენ პოლიცია უნდა დაიცვათ ამისგან და აარიდოთ, სწორედ ამის საუკეთესო საშუალებაა თანამდებობიდან გადადგომა. როცა თქვენ ამბობთ, რომ სანამ არ გამოიძიებთ… მესინჯერში რამდენიმე ადამიანმა მომწერა, ჩვეულებრივმა უცნობებმა, რომ ერთი კითხვა გვაქვს: კი მაგრამ, თუ თვითონ იქნება მინისტრი, როგორ უნდა გამოიძიოს ობიექტურადო? ამაზე არის საუბარი – პოლიტიკურ პასუხისმგებლობაზე, რომელიც ან არის, ან არ არის.
გიორგი გახარიამ მერაბ მეტრეველს საპასუხოდ უთხრა, თუ რით განსხვავდებოდა 20 ივნისის დარბევა სხვა დარბევებისგან:
“თქვენ ბევრი მაგალითი ჩამოთვალეთ, 9 აპრილიდან დაწყებული და რამდენიმე – მოდით, ასე შევთანხმდეთ, ჩვენ დღეს ვცხოვრობთ თანამედროვე საქართველოში, დემოკრატიზაციის იმ პროცესში და იმ პოლიტიკურ პროცესში, რომელსაც ყველა ვიცნობთ. როდესაც ვსაუბრობთ პოლიტიკურ პროცესებზე, კიდევ ერთხელ ვამბობთ, რომ ჩვენ 20 რიცხვში ვნახეთ ორგანიზებული შტურმი არა პოლიციელზე და არა პოლიციაზე… კიდევ ერთხელ ვამბობ, შტურმის პირობებში პასუხისმგებლობა პოლიციის არის, დაიცვას სახელმწიფო ინსტიტუტი.
პოლიცია ღამის 2 საათამდე პარლამენტის პერიმეტრს მიღმა არ გამოსულა, ნაბიჯი არ გადმოუდგამს და ეს 5 საათი გრძლედებოდა ჩვეულებრივი ორგანიზებული შტურმი, ძალადობრივი, ფიზიკური სახელმწიფო ინსტიტუზე და პოლიციაზე. არ შევდივარ დეტალებში, რამდენი გამოიტაცეს და კიდევ ბევრი რაღაცა.. ჩვენ ახლა სხვა კონტექსტში ვსაუბრობთ, მე ვთვლი და ვფიქრობ, რომ პოლიციის პირდაპირი უფლებამოსილება კი არა, ვალდებულებაა იმოქმედოს მსგავს პირობებში და შემთხვევაში იმისთვის, რომ დაიცვას კონსტიტუცია, ინსტიტუტი და მოქალაქე.
მოდით, შევთანხმდეთ, პირველი შემთხვევაა, მგონი, როდესაც ყველანი, არასამთავრობო თუ საერთაშორისო, რომ პოლიციის მიერ ძალის გამოყენება იყო ლეგიტიმური…
მერაბ მეტრეველი: 26 მაისს [2011 წელს] ამერიკის საელჩომ გააკეთა განცხადება, მახსოვს, თამარ ჩუგოშვილმა, რომელიც მაშინ საია-ს თავმჯდომარე იყო, მანაც თქვა, რომ აქციის დარბევა ლეგიტიმური, კანონიერი იყოო, მაგრამ ფორმები იყო არალეგიტიმური, ამაზე არის საუბარი, თორემ იმაზე კი არა, რომ აქციის დარბევა არ შეიძლებოდა.
გიორგი გახარია: აქ დარბევაზე კი არ არის საუბარი, თავდაცვაზეა საუბარი. ეს არის შემთხვევა, როდესაც ორგანიზებულმა ჯგუფებმა ფიზიკური შტურმი მიიტანეს პოლიციაზე. ეს არ ყოფილა რაღაც პროაქტიული ქმედება პოლიციის მიერ რაღაცის განეიტრალების. ეს თავდაცვა იყო და ეს იყო თავდაცვა 5 საათის განმავლობაში, რომელსაც თავისი შედეგები ჰქონდა. მე არ ვსაუბრობ და არ განვიხილავ პოლიტიკურ შედეგებზე ამ ღონისძიების.
გეუბნებით, რომ ეს იყო შემთხვევა, როდესაც ფიზიკური ორგანიზებული შტურმი იყო მიტანილი, რომელსაც ჩვენ ყველა პირდაპირ ეთერში ვუყურებდით. რა თქმა უნდა, ის, რაც შემდგომ კითხვის ნიშნები გაჩნდა პროპორციულობასთან დაკავშირებით, ეს გამოძიების საგანია და აქ ჩვენ ყველამ უნდა მივხედოთ. და აქ ჩვენ არანაირი პრობლემა ამასთან დაკავშირბეით არ გვაქვს.
