იცით რაიმე პირველი რესპუბლიკის დროინდელ მოღვაწე ოლღა სანიკიძე-ვალაბუევაზე?

საბჭოთა წარსულის კვლევის ლაბორატორია (SovLab) აცხადებს, რომ ეძებს დამატებით ინფორმაციას პირველი რესპუბლიკის დროინდელ მოღვაწე ქალზე, ოლღა სანიკიძე-ვალაბუევაზე. მისი სახელი, სოვლაბის ცნობით, საბჭოთა ტერორის შემდეგ თითქმის უკვალოდ გაქრა.

ოლღა სანიკიძე-ვალაბუევა, სოვლაბის თანახმად, ერთ-ერთი იყო იმ ორი ქალიდან, ვინც 1918 წლის 26 მაისს საქართველოს დამოუკიდებლობის აქტს მოაწერა ხელი [მეორე ასევე ეროვნული საბჭოს წევრი, საქართველოს სოციალ-დემოკრატიული მუშათა პარტიის წარმომადგენელი მინადორა ტოროშელიძე იყო].

სანიკიძე-ვალაბუევაზე მცირე ცნობებია შემორჩენილი: იგი 1883 წელს დაიბადა ქუთაისში, აზნაურის ოჯახში; მიიღო უმაღლესი განათლება — იგი პედაგოგი იყო; 1910-იან წლებში ეწეოდა კომერციულ საქმიანობას. საქართველოს სოციალისტ-რევოლუციონერთა პარტიის წევრი, 1917 წელს საქართველოს ეროვნულ საბჭოში ირიცხებოდა. იმავე წლიდან თბილისის მე-2 ქალთა გიმნაზიის დირექტორი იყო.

სოვლაბის თანახმად, საქართველოს საბჭოთა რუსეთის მიერ ოკუპირების შემდეგ სანიკიძე-ვალაბუევა ჩაბმული იყო წინააღმდეგობის მოძრაობაში: თავდაპირველად გიმნაზიის ბაზაზე ორგანიზებას უწევდა 1921 წელს საბჭოთა რუსეთის წითელი არმიის წინააღმდეგ ბრძოლაში დაჭრილი საქართველოს არმიის და გვარდიის ჯარისკაცების დახმარების საქმეს; შემდგომ, სავარაუდოდ იყო ქალთა “პოლიტიკური წითელი ჯვრის” წევრი.

იგი 1921 წლის აპრილში დააპატიმრა საქართველოს სსრ საგანგებო კომისიამ (“ჩეკამ”) პოლიტიკური საბაბით — გამოძიება ცდილობდა, დაემტკიცებინა რომ იგი მოსწავლეებს უკრძალავდა კლასში “ინტერნაციონალის” (საერთაშორისო პროლეტარული ჰიმნის) შესრულებას. პატიმრობიდან ამნისტიის შედეგად გაათავისუფლეს, რის შემდეგაც, 1920-იან წლებში, მუშაობას მე-2 გიმნაზიაში აგრძელებდა.

თუმცა უცნობია ოლღა სანიკიძე-ვალაბუევას ბედი ამის შემდეგ. სოვლაბი მოქალაქეებს მოუწოდებს, გაავრცელონ მასზე ინფორმაცია და აპოვნინონ ადამიანები, ვინც მეტი იცის ოლღა სანიკიძეზე, “რათა კიდევ ერთი ქალის ისტორია დავაბრუნოთ საერთო მეხსიერებაში”.

სოვლაბს შეგიძლიათ დაუკავშირდეთ ფეისბუკზე,

ნეტგაზეთის მასალების სხვა გამოცემებში გადაბეჭდვის წესი
ავტორი
ლუკა პერტაია 2018 წლის 1 სექტემბრიდან არის ნეტგაზეთის რეპორტიორი. ის ადრეც მუშაობდა ნეტგაზეთში — 2016 წლის მაისიდან 2017 წლის თებერვლამდე. Email: lukapertaia@gmail.com