ხაიშის სკოლის მათემატიკის მასწავლებლი და აქტივისტი, ზურაბ ნიჟარაძე ნეტგაზეთთან ამბობს, რომ შელაპარაკების დროს ერთ-ერთმა პოლიციელმა იარაღი გადატენა და ადგილობრივს შუბლზე მიაბჯინა. ნეტგაზეთმა ჰკითხა შსს-ს, თუ დაიწყო აღნიშნულზე მოკლევა.
“თუ მსგავს ფაქტს ადგილი ჰქონდა, მიმართონ გენინსპექციას და შესაბამისი რეაგირება მოხდება,” – გვპასუხობენ შსს-ში.
როგორც ნიჟარაძე ამბობს, იმის შემდეგ, რაც პოლიციელი ადგილობრივს თოფით დაემუქრა, სიტუაცია დაიძაბა.
“ამაზე განერვიულდა იქ ყველა და კიდევ კარგი, ისევ ადგილობრივს დახმარებით გაარიდეს ის იქიდან… საბედნიეროდ, არაფერი მოხდა და ქართველებმა კიდევ ერთხელ არ დავხოცეთ ერთმანეთი. დაკავებით არავინ დაუკავებიათ.”
დაპირისპირების შემდეგ ხაიშსა და ჭუბერში ასობით პოლიციელი შეიყვანეს. ამჟამად ხაიშის ცენტრი გადაკეტილია, სადაც დაახლოებით 200 ადგილობრივი და გაცილებით მეტი სამართალდამცველი იმყოფება.
- დღეს, 26 ივლისს, ხაიშსა და ჭუბერში ფინანსური პოლიცია შევიდა, რასაც მოსახლეობასთან დაპირისპირება მოჰყვა. საქმე ხე-ტყის შესაძლო უკანონო მოპოვებას ეხება.
- დაპირისპირების შემდეგ სვანეთში ასობით პოლიციელი შევიდა. შსს-ში განგვიცხადეს, რომ უსაფრთხოების მიზნით შეიყვანეს დამატებით პოლიციის ჯგუფები ორ სოფელში, თუმცა არავინ დაუკავებიათ.
- ფინანსთა სამინისტროს საგამოძიებო სამსახურიდან გვაცნობეს, რომ ამ დრომდე მიმდინარეობს ღონისძიება ჭუბერსა და ხაიშში ხე-ტყის უკანაონო მოპოვებასტან დაკავშირებით, თუმცა ადგილობრივი მოსახლეობა მათ კვლავ არ აძლევს საგამოძიებო მოქმედებების ჩატარების საშუალებას.
- ადგილობრივები საზოგადოებას, ხელისუფლებას, სახალხო დამცველს და დიპკორპუსს მოუწოდებენ, დაიცვან სვანეთი განუკითხაობისგან: “მოგვეცით ალტერნატიული განვითარების საშუალება ან დაგვცოხეთ და ამით დასრულდება ყველაფერი! დაგვაყენეთ საშველი, სანამ მთელი სვანეთი არ გამსკდარა დენთის კასრივით!
