რა ცვლილებებია რესპუბლიკურ პარტიაში

დავით უსუფაშვილი რესპუბლიკურ პარტიაში თავმჯდომარის პოსტს დატოვებს.  როგორც ნეტგაზეთს პარტიის პრესსამსახურმა განუცხადა,  რესპუბლიკურ პარტიაში ცვლილებები იგეგმება. თავმჯდომარის შეცვლის გარდა, პარტია გადახალისდება და ახალი სახეებით შეივსება.

პრესსამსახურის ინფორმაციით, მას შემდეგ, რაც დავით უსუფაშვილი საქართველოს პარლამენტის თავმჯდომარე გახდა, პარტიაში მიმდინარეობს მუშაობა კონკრეტულ ჯგუფებთან, თუ ვინ შეძლებს უსუფაშვილის შეცვლას.

 

რესპუბლიკური პარტიის წესდების მიხედვით, სანამ პარტიის ყრილობაზე ახალ თავმჯდომარეს არ აირჩევენ, მანამდე უსუფაშვილი პოსტზე დარჩება. ყრილობის ჩატარების ზუსტ თარიღს პარტიაში არ ასახელებენ. პრესსამსახურის ინფორმაციით, არ არის დაზუსტებული არც რიცხვი და არც თვე.

 

პარტიაში საპასუხისმგებლო თანამდებობებზე მყოფი პირების უმეტესობა პარლამენტის წევრია, ან მათ სხვა თანამდებობა აქვთ: პარტიის იდეოლოგიური მდივანი დავით ზურაბიშვილი განათლების მინისტრის მოადგილეა, რეინტეგრაციის საკითხებში სახელმწიფო მინისტრი პაატა ზაქარეიშვილი ეროვნული პარტიის კომიტეტის წევრია, პარტიის პოლიტიკური მდივანი ლევან ბერძენიშვილი პარლამენტის წევრია, ისევე, როგორც აღმასრულებელი მდივანი გიგლა აგულაშვილი. პრესსამსახურის ცნობით, 6 კაცისგან შემდგარი პარტიის სამდივნო უახლოეს პერიოდში გადახალისდება.

ნეტგაზეთის მასალების სხვა გამოცემებში გადაბეჭდვის წესი
თამარ ჩხეიძე