საქართველოს მართლმადიდებელი ეკლესიის საპატრიარქოს განცხადებით, ქალები, რომლებსაც აბორტი აქვთ გაკეთებული, და ექიმ-გინეკოლოგები ტაძარს ააშენებენ.
საპატრიარქოს ვებგვერდზე გამოქვეყნებული ინფორმაციის მიხედვით, 9 დეკემბერს გაიმართა ტაძრის მაშენებელთა სამუშაო ჯგუფი. საპატრიარქო აცხადებს, რომ ზემოხსენებულმა ადამიანებმა ტაძრის აშენება აბორტის გამო “სინანულის გამოსახატად” გადაწყვიტეს.
“ამ მიზნით, დღეს, 9 დეკემბერს, საქართველოს საპატრიარქოში შეიკრიბა ტაძრის მაშენებელთა სამუშაო ჯგუფი. ისინი დალოცა სრულიად საქართველოს კათოლიკოს-პატრიარქმა და დაწყებული საქმის წარმატებით განხორციელება უსურვა. ეკლესია აიგება ხუდადოვის ტყის მიმდებარედ”, – ნათქვამია საპატრიარქოს განცხადებაში.
