ქართული ოცნების საარჩევნო შტაბს კახა კალაძე უხელმძღვანელებს. ამის შესახებ დღეს ქართული ოცნების ცენტრალურ ოფისში პრემიერმა გიორგი კვირიკაშვილმა განაცხადა. კვირიკაშვილის თქმით, კალაძის “ორგანიზატორული ნიჭი, მენეჯერული თვისებები და გამოცდილება” სჭირდება ქართულ ოცნებას არჩევნების ღირსეულად ჩატარებისთვის.
“კალაძის გამორჩეული კაპიტნის თვისებები მნიშვნელოვანი იქნება, რომ მივაღწიოთ ღირსეულ გამარჯვებას. ჩვენი მთავარი მიზანია, რომ კონკურენცია კონფრონტაციაში არ გადაიზარდოს”, – განაცხადა კვირიკაშვილმა.
“დღეიდან ჩვენი პარტია იწყებს აქტიურ მზადებას ოქტომბრის საპარლამენტო არჩევნებისთვის, რომელშიც დამოუკიდებლად მიიღებს მონაწილეობას პარტია ქართული ოცნება”, – განაცხადა კახა კალაძემ.
დღეიდან, 8 ივნისიდან ოფიციალურად დაიწყო საარჩევნო კამპანია. საპარლამენტო არჩევნები 8 ოქტომბერს გაიმართება.
