რუსული კვების ობიექტი, რომელიც მოსკოვის მახლობლად მდებარეობს, საქართველოს რუკას დამახინჯებული სახით წარმოადგენს. რუკაზე, რომელზეც საქართველოს დროშაა გამოსახული, აფხაზეთი ჩამოჭრილია.

შესაბამისი ბილბორდის ამსახველი ფოტო სოციალურ ქსელში რამდენიმე დღის წინ გავრცელდა. კვების ობიექტმა “Свежов”, რომელშიც, ძირითადად, მზა კერძები და დესერტი იყიდება, საქართველოს დამახინჯებული რუკის ილუსტრაცია “ქართული კერძების კვირეულისათვის” მოამზადა. მის “ფეისბუქ” გვერდზე, ასევე “ინსტაგრამსა” და რუსულ “ვკონტაქტე”-ზე ქართული კერძების ფოტოებია გამოქვეყნებული, კუთხეში კი რუკის ილუსტრაციაა დატანილი.

“ფეისბუქის” საქართველოს მომხმარებლების პროტესტის, უარყოფითი გამოხმაურებებისა და სოციალური ქსელის ადმინისტრაციასთან გასაჩივრების შემდეგ, კვების ობიექტის გვერდი აღარ იძებნება. თუმცა, დამახინჯებული რუკის შემცველი მასალები სხვა სოციალურ ქსელებში კვლავ ხელმისაწვდომია.

კვების ობიექტის გვერდი “ვკონტაქტე”-ზე.

კვების ობიექტის გვერდი “ინსტარგრამზე”.

საჯარო ინფორმაციის თანახმად, “Свежов” 2014 წელს დაფუძნდა და რუსეთის დედაქალაქის მახლობლად, ქალაქ ივანტეევკაში მდებარეობს, მისი გენერალური დირექტორი კი ალექსანდრ მასლიკოვია.