სანდრო ბარამიძე ენმ-სა და “ოცნებას” ძალაუფლებისთვის მებრძოლ ავტოკრატებს უწოდებს

იუსტიციის მინისტრის ყოფილი მოადგილე სანდრო (ალექსანდრე) ბარამიძე, რომელმაც პოსტი 2018 წლის ივნისში დატოვა, მიიჩნევს, რომ საპრეზიდენტო არჩევნების მეორე ტურში გასული კანდიდატების მიზანი არა ქვეყნის დემოკრატიულ განვითარებაზე ზრუნვაა, არამედ ძალაუფლების მოპოვება და შენარჩუნება

სანდრო ბარამიძე თეა წულუკიანის მოადგილედ 2012 წლის შემოდგომაზე, ხელისუფლების ცვლილებისთანავე დაინიშნა, 2013 წლიდან კი მას მინისტრის პირველი მოადგილის პოსტი ეკავა.

ბარამიძემ “ნაციონალური მოძრაობისა” და “ქართული ოცნების” მიმართ კრიტიკულად განწყობილი ტექსტი ფეისბუკის პირად გვერდზე გამოაქვეყნა, სადაც წერს:

“მე არ ვაპირებ მივცე ხმა მეორე ტურში გასულ რომელიმე კანდიდატს და აი, რატომ:

  1. ჩემი კანდიდატი მეორე ტურში ვერ გავიდა, თუმცა, ამის მოლოდინი არც მქონდა;
  2. არც ვაშაძეს და არც ზურაბიშვილს ხმას არცერთ სიტუაციაში არ მივცემ, რადგან არცერთი არ შეესაბამება ჩემ პოლიტიკურ შეხედულებებსა და ფასეულობებს;
  3. მე არ ვეხები მათ პიროვნებას. იარლიყების მიწებება ჩემი სტილი არ არის. მთავარი ისაა, რომ ორივე მათგანი საკუთარი ავტორიტეტის მქონე პოლიტიკური ფიგურა კი არ არის, არამედ ვიღაც სხვისი წარმომადგენელია. ორივე შემთხვევაში ეს ვიღაც “სხვა” ავტოკრატია, რომლის მთავარი მიზანი პიროვნული ძალაუფლების მოპოვება ან/და შენარჩუნებაა და არა ქვეყნის დემოკრატიულ განვითარებაზე ზრუნვა;
  4. რომელი რომელს სჯობს, ეს ჩემი განსასჯელი არ არის. ამაზე ორთოდოქსმა ნაცებმა და ქოცებმა იდავონ. მე ვერ გავხდები რომელიმე მათგანის მძევალი და არ დავყვები მათ პრიმიტიულ ლოგიკას, რომ თუ “მოღალატეს” მისცემ ხმას, შენც მოღალატე იქნები, ხოლო თუ ვაშაძეს მისცემ ხმას, ამით სისხლში გაისვრები, რადგან სისხლიანი რეჟიმის დაბრუნებას მიეცი ხმა. სწორედ ასეთი მიდგომაა ფაშიზმიც, ბოლშევიზმიც და ყოველივე სხვა უბედურება, რადგან არცერთი არ იგუებს განსხვავებულ პოზიციას;
  5. მე ვთვლი, რომ საჭიროა რაღაც ახალი პოლიტიკური ძალა, რომელიც სახლში დარჩენილი ხალხის ინტერესის გამომხატველი იქნება. პირველ ტურში არგამოცხადებული 55%-დან 20% მაინც ხომ არის ისეთი, რომელიც სიამოვნებით წავიდოდა არჩევნებზე, მისთვის მეტ-ნაკლებად მისაღები კანდიდატი რომ ჰყოლოდა?
  6. ამასთანავე, მე მაქვს არჩევანი, როგორ მოვიქცე ასეთ სიტუაციაში: ან არ უნდა წავიდე არჩევნებზე, ან უნდა წავიდე და გადავხაზო ორივე კანდიდატი. ამ ორი შესაძლებლობიდან, მე პირადად, ვირჩევ მეორეს. ვიცი, რომ ჩემი ბიულეტენი ბათილად გამოცხადდება, მაგრამ არა უშავს. გამარჯვებული კანდიდატის ლეგიტიმაცია ამ ერთი მიუცემელი ხმით მაინც შემცირდება. სხვას შეუძლია აირჩიოს მეორე ვარიანტი და დარჩეს სახლში.

ამდენად, ვისაც არ გაქვთ პოზიტიური არჩევანი, ნუ გახდებით რომელიმე მხარის უკიდურესად აგრესიული ნეგატიური კამპანიის მსხვერპლი და ნუ განამტკიცებთ თქვენი ნების საწინააღმდეგოდ თქვენთვის მიუღებელი კანდიდატის ლეგიტიმაციას. დარჩით სახლში, ან წადით და გადახაზეთ ორივე კანდიდატი”.

2018 წლის 28 ოქტომბრის საპრეზიდენტო არჩევნებზე, ცენტრალური საარჩევნო კომისიის წინასწარი მონაცემებით, პირველ ადგილზე “ქართული ოცნების” მიერ მხარდაჭერილი კანდიდატი სალომე ზურაბიშვილი გავიდა. ზურაბიშვილმა ხმების 38.64% მიიღო. მეორე ადგილზე 37.74%-ით პოლიტიკური გაერთიანება “ძალა ერთობაშიას” კანდიდატი გრიგოლ ვაშაძეა. იმის გამო, რომ პირველივე ტურში ხმების 50%-ზე მეტი ვერცერთმა კანდიდატმა ვერ მიიღო, 2 დეკემბრამდე უნდა გაიმართოს არჩევნების მეორე ტური.

ნეტგაზეთის მასალების სხვა გამოცემებში გადაბეჭდვის წესი


ავტორი
თაზო კუპრეიშვილი არის "ნეტგაზეთის" რედაქტორი 2018 წლის პირველი თებერვლიდან.