ქალთა მოძრაობის წევრი “ნეტგაზეთთან” საუბრისას ამბობს, რომ 8 ოქტომბრის საპარლამენტო არჩევნების შემდეგ საკანონმდებლო ორგანოში ქალი დეპუტატების რაოდენობა შესაძლოა 12%-საც ჩამოსცდეს. ამის საფუძველს მას პარტიულ სიებში გენდერული კუთხით შექმნილი მდგომარეობა აძლევს.

ბაია პატარაია ამბობს, რომ თუ გადავხედავთ სხვადასხვა რეიტინგს და წინასწარ გავთვლით, მიახლოებით როგორ შეიძლება გადანაწილდეს პროცენტული მაჩვენებელი პარტიებს შორის, მივდივართ იმ დასკვნამდე, რომ ქალთა მონაწილეობა პარლამენტში არათუ გაიზრდება, არამედ შესაძლოა შემცირდეს და 12%-იან ნიშნულს ჩამოსცდეს.

“ამდენი ხანი ვსაუბრობთ ამ პრობლემაზე, თითქმის ყველა პარტია აღიარებს, რომ ეს პრობლემა მწვავე პრობლემაა. დაპირებაც მივიღეთ – იმის მიუხედვაად, რომ ისინი მხარს არ უჭერენ კვოტებს, ხელს შეუწყობენ ქალთა ჩართულობას პოლიტიკაში, მაგრამ ეს დაპირება აღმოჩნდა ფუჭი და ვდგავართ იმ რეალობის წინაშე, რომ 2016 წლის პარლამენტში იქნება ძალიან ცოტა ქალი და მთელი მომდევნო 4 წლის მანძილზე მსგავსი რეალობა გვექნება”, – ამბობს პატარაია.

ქალთა უფლებების დამცველი მიიჩნევს, რომ პარტიულ სიებში გენდერული ასპექტი კიდევ ერთხელ ადასტურებს, რომ გენდერული კვოტირების მოთხოვნა სამართლიანია, რადგან არც ფინანსურმა წახალისებამ არ იმუშავა და არც სხვა ტიპის მოლაპარაკებებმა და დაპირებებმა.

პატარაიას თქმით, არ მუშაობს ფინანსური წახალისების მექანიზმიც,  რადგან რამდენიმე წელია კანონის ეს ნორმა ამოქმედდა, თუმცა ამას გავლენა არ მოუხდნია საარჩევნო სიებში გენდერული ბალანსის დაცვაზე.