”ჩვენ მას მივაწოდებთ ინფორმაციას, რადგან მან სურვილი გამოთქვა ჩვენთან შეხვედრის  და ეს არის გარკვეული მხარდაჭერის მანიშნებელი,” – აცხადებს გაზეთ “რეზონანსის” რედაქტორი ელისო ჩაფიძე “ნეტგაზეთთან” საუბარში. მისივე თქმით, “პრესის ასოციაცია” აღნიშნულ საკითხთან დაკავშირებით შეხვედრებს მართავს ყველა პოლიტიკურ ძალასთან, რომელიც დაინტერესებულია საკითხის მოგვარებით. მაგალითად, ასოციაციის წარმომადგენლებმა გუშინ შეხვდრა გამართეს “ქრისტიან–დემოკრატებთან” და თბილისის მერიის ქონების მართვის სააგენტოს წარმომადგენელთან, თუმცა მოლაპარაკება მერიასთან უშედეგოდ დასრულდა: 

”ჩვენი პოზიციაა, რომ ჩატარდეს სპეციალიზებული აუქციონი, რომელშიც მხოლოდ პრესის გამავრცელებლები მიიღებენ მონაწილეობას, რაზეც მერიიდან მივიღეთ პასუხი: მიიღეთ აუქციონში მონაწილეობა და თუ გაიმარჯვებთ, გექნებათ ჯიხურები. მე ვთვლი, რომ ამ აუქციონებში გაზეთების გამავრცელებელი კომპანიები ვერ გაუწევენ კონკურენციას ”კოდას”, ”ნუგეშს” და კეზერაშვილის კომპანიებს,”- აღნიშნავს ჩაფიძე.

იმ შემთხვევაში, თუ მერია მოლაპარაკებაზე არ წამოვა, ”პრესის ასოციაცია” პროტესტის სხვადასხვა ფორმას მიმართავს, რადგან მათი თქმით, მერიის მიერ მიღებული გადაწყვეტილების შედეგი უკვე აისახა უარყოფითად პრესაზე, კერძოდ, გავრცელების შეზღუდვის გამო დაეცა გაზეთების ტირაჟები:

”ჩვენ შევეცდებით ვაიძულოთ, მოლაპარაკებებზე წამოვიდნენ, რათა მოწესრიგდეს მედიის გავრცელება, ისე, როგორც ესაა ცივილიზებულ სამყაროში. გამოვიყენებთ ყველა ჩვენს ხელთ არსებულ საშუალებას, დავწერთ სტატიებს, მიმართვებს საერთაშორისო ორგანიზაციებისადმი,  პრესის საბჭოებისა და მსოფლიო პრესის ასოციაციისადმი”