ევროპარლამენტარ მირიამ ლექსმანის შეფასებით, კანონი, რომლის მიღებასაც “ქართული ოცნება” გამჭვირვალობის საბაბით ცდილობს, “იგივე მოდელია, როგორიც არის პუტინის რუსეთში”.
ევროპარლამენტში სიტყვით გამოსვლისას ლექსმანმა დაასახელა ნაბიჯი, რითაც, მისი აზრით, უნდა უპასუხონ “ქართული ოცნების” მცდელობას, მიიღოს რუსული კანონი მოქალაქეთა წინააღმდეგობის მიუხედავად.
“საქართველოს მთავრობამ კიდევ ერთხელ დააინიციირა კანონპროექტი უცხოური გავლენის გამჭვირვალობის შესახებ. ფაქტია, რომ კანონპროექტის ტექსტი, რომელსაც განიხილავს საქართველოს პარლამენტი, ეწინააღმდეგება ევროკომისიის იმ რეკომენდაციებს, რომლებიც უნდა შეესრულებინა საქართველოს კანდიდატის სტატუსის მისაღებად. ეს არის იგივე მოდელი, როგორიც არის პუტინის რუსეთში. კრემლისა და სხვა ავტორიტარულ რეჟიმთან ბრძოლის ნაცვლად, ეს კანონი ძირს უთხრის სამოქალაქო საზოგადოებასა და დამოუკიდებელ მედიას. კანონზე, რომელიც ეწინააღმდეგება ქართველი ხალხის მისწრაფებებს და უგულებელყოფს ევროკომისიის რეკომენდაციებს, ჩვენი პასუხი უნდა იყოს ნათელი:
პირველ რიგში, ჩვენ უნდა გავყინოთ მოლაპარაკების გახსნის პროცესი საქართველოსთვის; მეორე, ნებისმიერ სამომავლო ფინანსური დახმარება უნდა იყოს გაცემული იმ პირობით, თუ ამ საზიანო კანონს გაიწვევენ; ბოლოს, მე კიდევე ერთხელ მოვიწოდებ ევროპულ საბჭოს, სანქციები დაუწესოს ოლიგარქ ბიძინა ივანიშვილს და თავისუფლება მიხეილ სააკაშვილს”, – განაცხადა მირიამ ლექსმანმა.
დღეს, 23 აპრილს ევროპარლამენტში გაიმართა დებატები საქართველოს შესახებ. სესიის სახელწოდება იყო “საქართველოში უცხოელი გავლენის აგენტების შესახებ კანონის მიღების ხელახალი მცდელობა და მისი გავლენა სამოქალაქო საზოგადოების შეზღუდვაზე”.
ამავე დღეს ევროპარლამენტში დაინიციირდა რეზოლუცია “საქართველოში უცხოელი აგენტების კანონის ხელახალი შემოღების მცდელობისა და სამოქალაქო საზოგადოების შეზღუდვების შესახებ”. რეზოლუციის ავტორების შეფასებით, კანონი საკამათოდ მიიჩნევა და ხელისუფლებას დამოუკიდებელი ხმების დისკრედიტაციისა და შეზღუდვის მძლავრ ინსტრუმენტს აძლევს. ამასთან, საფრთხეს უქმნის პრესისა და გამოხატვის თავისუფლებას და შეამცირებს საზოგადოებრივი ცხოვრების ნამდვილ გამჭვირვალობას საქართველოში. რეზოლუციის კენჭისყრა 25 აპრილს გაიმართება
