ბატონო მიხეილ, თუ მოისმინეთ პატრიარქის ქორეპისკოპოსის დღევანდელი ქადაგება?
არა, არ მომისმენია.
ქადაგების პირველ ნაწილში სასამართლოზე ისაუბრა, აღნიშნა, რომ მიუხედავად რეფორმისა, სასამართლო ვერ გათავისუფლდა წინა ხელისუფლების გავლენისგან…
მე მორწმუნე კაცი ვარ, ქორეპისკოპოსის ქადაგება ჩემთვის სხვა რამეა, მაგ ტიპის ქადაგებაზე ვერ გავაკეთებ კომენტარს. მე მესმის ქადაგება, როცა ბიბლიაზეა საუბარი და არა პოლიტიკურ საკითხებზე.
მთელი ქადაგება პოლიტიკური იყო, მან პირდაპირ მოუწოდა ადამიანებს, რომ მივიდნენ არჩევნებზე, რათა “ნაციონალური მოძრაობა” არ დაბრუნდეს, “ნაციონალურ მოძრაობას” ურჩია, რომ გვერდზე გადგნენ, რისთვის გსურთ დაბრუნება, რომ ისევ აწამოთ ადამიანები?– ეს იყო ქადაგების რიტორიკა
ვერ გავაკეთებ მაგაზე კომენტარს, ამბიონი მე მესმის, რომ ისაუბრო რელიაგიაზე, სიყვარულზე, ურთიერთპატივისცემაზე, ურთიერთშენდობაზე, პოლიტიკური ნაწილისთის ამბიონი ნამდვილად არ არის. არ მომისმენია, თუ რასაც თქვენ ამბობთ, ის ისაუბრა, მაშინ არც ვაპირებ, რომ მოვისმინო.
ბატონო მიხეილ, რატომ გიკვირთ, რომ პოლიტიკურ განცხადებებს აკეთებს საპატრიარქოს წარმომადგენელი, ამ შემთხვევაში ქორეპისკოპოსი, ჩვენ არაერთხელ გვიხილავს ასეთი განცხადებები და უშუალოდ პოლიტიკურ გადაწყვეტილებებში ჩარევის მცდელობა, რატომ არის უცნაური თქვენთვის, რომ ამბიონს პოლიტიკური მესიჯებისთვის იყენებს?
მიკვირს იმიტომ, რომ მე ვურთიერთობ მეუფეებთან, ვიცი მათი განწყობა და მათი დამოკიდებულება, რომ ამბიონი და ეკლესია არ არის [პოლიტიკური განცხადებების ადგილი] გარდა იმისა, რომ მოუწოდო საქართველოს მტრებს, ოკუპანტს…
“ნაციონალური მოძრაობაც” მტრად დასახა ამ ქადაგების მიხედვით
ღმერთი მოკითხავს, თუ ეგრეა. ადრეც ყოფილა ასეთი შემთხვევები, მერე მისაუბრია საეკლესიო პირებთან, მეუფეებთან და მათი დამოკიდებულებაც ვიცი, ანუ არის ასეთი ნაწილი. როგორც საზოგადოებაა ჭრელი, იქაც, როგორც ჩანს, სხვადასხვანაირად ფიქრობენ.
ჩვენ საკმაოდ მაღალი წოდების პირზე ვსაუბრობთ, პატრიარქის ქორეპისკოპოსზე, როცა პატრიარქი არ არის საქართველოში, მის ნაცვლად ქადაგებს, არ არის რიგირთ მღვდელმსახური.
ჩემი აზრით, ზოგიერთი რიგითი მღვდელმსახური ზოგიერთ ქორეპისკოპოსზე კომპეტენტური შეიძლება იყოს რაღაც საკითხში.
თქვენ ახსენეთ, რომ გქონიათ მსგავსი შემთხვევბი და საუბრები, რას გულისხმობდით კონკრეტულად?
იყო ასეთი განცხადებებიც, სხვათა შორის, რაღაც პერიოდის წინ, არ ვიმახსოვრებ, როგორც წესი, ასეთ რაღაცებს, იმიტომ, რომ ეს არის ეკლესია, რომელიც უნდა გაერთიანებდეს, ფიქრობდეს სიყვარულზე და არა ურთიერთდაპირისპირებაზე და ანგარიშსწორებაზე, როცა ქადაგებაა, მე მხოლოდ ვუსმენ იმას, რაც ჩვენი რელიგითაა გათვალისწინებული ..
თქვენი აზრით, საქართველოს ეკლესია ქრისტიანული პრინციპებით ქადაგებს?
ჩემი მოძღვარი, ის ადამიანები, ვისთანაც მე ვურთიერთობ, კი. ბოლოს ვიყავი უკრაინის პატრიარქთან…
ჩვენს რეალობაზე გეკითხებით.
ჩვენ რეალობაზეც გეუბნებით, ის ადამიანები, ვისთანაც მე ვურთიერთობ, ნამდვილად ქრისტიანული პრინციპებით ხელმძღვანელობს, მაგრამ არიან სხვანაირებიც. ღმერთი მოკითხავს ამ სხვანაირებს, მე რა უნდა გითხრათ?
გასაგებია, რომ საპატრიარქო ჭრელია და მის შიგნით არსებობენ კეთილსინდისიერი სასულიერო პირები…
საზოგადოების ნაწილია, თარგია, როგორიცაა საზოგადოება, ისეთია საპატრიარქოც.
მაგრამ რომ გამოვიდეთ ამ ვიწრო წრიდან და მხოლოდ იმ ადამიანებით არ ვიმსჯელოთ, ვისთანაც თქვენ ურთიერთობთ და ზოგად სურათს შევხედოთ. იგივე პატრიარქი, ქორეპისკოპოსი, რომლებიც ამ ინტიტუტის სახელით საუბრობენ…
პატრიარქი ყოველთვის საუბრობს რელიგიის სიყვარულზე, ურთიერთსიყვარულზე. რასაც თქვენ მეუბნებით, რაც ამ მეუფემ იქადაგა, სულ სხვა რაღაცაა.
შეიძლება პატრიარქი უკეთესი დიპლომატია, თქვენ ფიქრობთ, რომ ქორეპისკოპოსი ამ შემთხვევაში არ საუბრობს საპატრიარქოს სახელით და მხოლოდ მისი მოსაზრებებია?
შეიძლება ნაწილი არის მისი მოსაზრებები, ნაწილი სხვისი [საპატრიარქოსი], არ მინდა ამაზე ვიფიქრო, ვერ გეტყვით.
“ნაციონალური მოძრაობის” დროსაც ქორეპისკოპოსი იყო ეს ადამიანი, თუ გახსოვთ მისი მხრიდან უკმაყოფილება, მსგავსი დამოკიდებულების შესახებ თქვენთვის ცნობილი იყო?
არა, ასე ღიად არ გამოუხატავს. არ მახსენდება, ვერ გეტყვით.
ერთხელ უკვე გკითხეთ და გაგიმეორებთ, რატომ არ არის თქვენთვის ლოგიკური პოლიტიკური განცხადებების კეთება სასულიერო პირებიდან, როცა ვხედავთ, რომ საპატრიარქო ცდილობს პოლიტიკურ გადაწყვეტილებებში ჩარევას, აპროტესტებს კანონს, იქნება ეს მიწის გაყიდვის, ანტიდისკრიმინაციული კანონი თუ სხვა?
მან შეიძლება აზრი გამოხატოს, მე ამაში პრობლემას ვერ ვხედავ.
თქვენ ფიქრობთ, რომ ეს აზრის გამოხატვაა მხოლოდ და არა ჩარევა? მაგალითად, იყო მოწოდებებიც, რომ არ მიიღოთ ესა თუ ის კანონი, რადგან დაღუპავს ქვეყანას; მაგალითად, თვითმართველობის შესახებ გაკეთებული განცხადება, რომ ეს დაშლის საქართველოს. ადამიანების მობილიზება, აქციის ჩატარება, ეს აზრის გამოხატვაა მხოლოდ, თუ სახელმწიფოს ეუბნებიან, რომ მათ აქვთ ძალა? არ არის ასე?
მე არ ვიცი, რაღაც ნაწილში შეიძლება არის, რაღაც ნაწილში არ არის. ასე ღრმად ვერ ვისაუბრებ, თან დავდივარ, თან გესაუბრებით, რაღაც საქმეს ვაკეთებ.
ბოლო შეკითხვაც, თქვენი ხელისფლების დროს განსაკუთრებულად გაიზარდა ამ ინსტიტუტის დაფინანსება მილიონობით ლარით, ჩუქნიდით მიწებს და სხვა მატერიალურ ქონებას.
მანდ ვერ ვხედავ პრობლემას.
და მიუხედავად ამისა, თქვენი აზრით, ეს ადამიანი რატომაა ასე უკმაყოფილო თქვენი ხელისუფლებით?
არ ვიცი, ღმერთმა შეუნდოს და მოკითხოს, არ ვიცი მართლა. მაგარმ როდესაც ჩვენ ასე ვხელმძღვანელობდით, დაფინანსებაზე ვსაუბრობ, კონკორდატის შედეგად ჩვენ ვაღიარეთ, რომ კომპენსაცია სახელმწიფომ უნდა გასცეს ეკლესიის მისამართით, გამომდინარე იქიდან, რაც მოხდა, როცა ეკლესიას ჩამოერთვა ქონება და ასე შემდეგ, ეს იყო კომპენსაციის ნაწილი, მოსყიდვა კი არ იყო. არავის უფიქრია მოსყიდვაზე.
კომპენსაცია დათვლილია, რაც ეკლესიას ეკუთვნის?
არა, უბრალოდ დავიწყეთ ამის კეთება, დათლილია-თქო რომ გითხრათ, მოგატყუებთ, იყო გადაწყვეტილება მიღებული, რომ განათლების საკითხებს უნდა მოხმარებოდა. ასე ღრმად არ ვარ ჩახედული, მათი გადასაწყვეტია.
თუ დაფინანსება მხოლოდ კომპენსაციის საკითხია, მაშინ მას ჭირდება ზუსტი დათვლა და ამ დათვლილი თანხის ფარგლებში ანაზღაურება. უსასურულოდ ხომ არ უნდა გაგრძელდეს?
ახალი ხელისუფლება ხომ ყველაფერს აკეთებს და მაგასაც დათვლის და გააკეთებს.
