ლეგიტიმურია თუ არა მერაბიშვილის ადვოკატების მოთხოვნა სამეთვალყურეო კამერების ჩანაწერების გასაჯაროებასთან დაკავშირებით, რომელიც მერაბიშვილის მტკიცებით დაადასტურებს იმას, რომ იგი საკნიდან გაიყვანეს და ოთარ ფარცხალაძესთან შესახვედრად წაიყვანეს შაბათს გამთენიისას?

მე ვფიქრობ და ვადასტურებ იმას, რომ ეს არის ძალიან მოკლეფეხებიანი ტყუილი, რომელიც ძალიან ადვილად დადასტურებადია. ამისათვის საჭიროა სამთვალყურეო კამერის ჩანაწერის ნახვა, თუმცა ამის უფლება ისე არ აქვს სასჯელაღსრულების დეპარტამენტს, რომ ამოიღოს და ტელევიზიაში გაუშვან. ამას 9 წელი აკეთებდნენ და ეს კანონდარღვევაა. ჩემი აზრით, პროკურატურამ უნდა დაიწყოს გამოძიება იმიტომ, რომ ის, რაც დღეს მერაბიშვილმა პროცესზე განაცხადა, არის დანაშაულის დაბრალება… თან ისეთი დანაშაულის, თურმე მთავარი პროკურორი პირადად რომ მონაწილეობს, ამიტომ ამის რეაგირების გარეშე დატოვება არ შეიძლება. აუცილებლად უნდა აღიძრას სისხლის სამართლის საქმე და, შესაბამისად, ამოიღოს პროკურატურამ ეს ჩანაწერი. მერე უკვე მისი განსაჯაროება პრობლემა აღარ იქნება.

პროკურატურამ უნდა გამოიძიოს ეს საქმე? ბრალდება ხომ სწორედ მთავარ პროკურორს ეხება…

რა მნიშვნელობა აქვს [ვინ გამოიძიებს]. სისხლის სამართლის საქმე არის დაუყოვნებლივ აღსაძრელი.

გიგა ბოკერიამ თქვა, რომ ეს საქმე საპარლამენტო კომისიამ უნდა გამოიძიოსო, რადგან ნდობა ნაკლებია პროკურატურის მიმართ ამ შემთხვევაშიო…

როგორც ჩანს, საპარლამენტო კომისიისადმი ნდობა ჰქონიათ… გასაგებია. ეს არ არის იმ ტიპის საქმე, სადაც სიმართლის დადგენა რთულია. ნდობა- არნდობის საკითხი აქ ვერ დადგება, იმიტომ, რომ ძალიან მარტივი, ძალიან მოკლეფეხებიანი ტყუილია, მარტივად დადასტურებადი: ჩანაწერში ან ჩანს, რომ ეს ადამიანი თავზე რაღაცით წაფარებული გამოჰყავთ საკნიდან, ან არ ჩანს. აქ რთული, ფუნდამენტურად გამოსაძიებელი საქმე არ არის. მე ამ საკითხის ასე დრამატიზებას არ გავაკეთებდი, მე ვფიქრობ, რომ ეს არის დანაშაულის დაბრალება, რომლისთვისაც მისი დადასტურების შემთხვევაში ბრალი უნდა წაეყენოს მას.

მერაბიშვილს უნდა წაეყენოს ბრალი?

დანაშაულის დაბრალებისთვის დამტკიცების შემთხვევაში.

რატომ გამორიცხავთ იდეაშივე, რომ მერაბიშვილმა სიმართლე თქვა?

ეს იმდენად მარტივად დადასტურებადია… მე ვიცნობ, ერთი მხრივ, პროკურატურის და მეორე მხრივ, სასჯელაღსრულების დეპარტამენტის განცხადებას, რომ ეს არის ტყუილი და ეს მე მაფიქრებინებს, რომ დიახ, ეს არის ტყუილი. მეორეც, მე ძალიან მიჭირს, რომ რამე დავიჯერო, რასაც მერაბიშვილი ლაპარაკობს, იმ ყველაფრიდან გამომდინარე, რაც ჩვენ ამ კაცთან ერთად გავიარეთ… ამიტომ კი, მე ნამდვილად დარწმუნებული ვარ, რომ ეს არის ტყუილი. ახლა საჭიროა, რომ ეს სწრაფად დადასტურდეს, რათა მითქმა–მოთქმა და განსაკუთრებული აჟიოტაჟი არ გამოიწვიოს ამ ყველაფერმა.

სასჯელარსრულების დეპარტამენტს ჯერჯერობით არ უთქვამს, რომ ეს არის ტყუილი, მათ არც უარყვეს და არც დაადასტურეს მერაბიშვილის ეს ბრალდება…

პროკურატურამ ხომ გააკეთა განცხადება?

პროკურატურამ განაცხადა, რომ აბსურდია ეს ბრალდება.

ეს ვიგულისხმე სწორედ. პროკურატურის განცხადება იყო, რაც სხვანაირად ვერ დადასტურდებოდა.

საპარლამენტო კომისიის საკითხს რომ დავუბრუნდეთ. ოპოზიცია, ნაცმოძრაობა ითხოვს ამას..

საპარლამენტო კომისია რატომ უნდა შევქმნათ? ეს შეიძლება მაშინ მოხდეს, როცა რაიმე ისეთი ხდება, რაზეც გამოძიება ვერ სცემს პასუხს. ეს არის 17–წუთიანი გამოძიების თემა, რად უნდა ამას საპარლამენტო კომისია და აჟიოტაჟი?! რახან ვანომ თქვა, ამიტომ მთელი ქვეყანა უნდა დავირაზმოთ და მისი სიტყვების მიხედვით ვიცხოვროთ?! გიგა ბოკერიას უნდა, რომ განსაკუთრებული მნიშვნელობა მიანიჭოს ამ საქმეს, მაგრამ არაფერი განსაკუთრებული ამაში არ იქნება, თუკი გამოძიება დაიწყება სწრაფად, ეს ვიდეოფირი იქნება ამოღებული და ყველაფერს ვნახავთ ყველანი… რად უნდა ამას ან პარლამენტიი ან პროკურატურაი ან ჩინები ან მედლები.

ანუ მაინც ფიქრობთ, რომ უნდა გასაჯაროვდეს ეს ვიდეოფირი…

ოღონდ იმ წესით, რა წესითაც არის კანონმდებლობით შესაძლებელი და არა ისე, როგორც გვაყურებინებდნენ ხოლმე სერიალივით ტელევიზიაში, უკანონოდ.

ამ შემთხვევაში ეს წესი როგორია?

ანუ გამოძიებაა დასაწყები. ისე არა, რომ ახლა სოზარს [სუბარი] მივადგეთ და ვუთხრათ, რომ გვაჩვენეთ ფირი, იმიტომ, რომ მას ამის უფლება არ აქვს.

თუ ეს ფირები დაადასტურებს იმას, რასაც ვანო მერაბიშვილი ამბობს…

დიდი ბოდიში, მაგრამ ეს თუ დადასტურდება, ეს ძალიან სერიოზული თემაა და აქ სახუმარო და სალაპარაკო ბევრიც არაფერი იქნება, მაგრამ მე დარწმუნებული ვარ, რომ ეს მოცემულობა არ დადგება.

როგორი იქნება თქვენი პოზიცია, თუ ეს დადასტურდება?

ზუსტად ისეთი, როგორიც ყოველთვის იყო მსგავსი საქმეების მიმართ და მნიშვნელობა არ აქვს ხელისუფლებაში ვარი თუ ოპოზიციაში.

უფრო კონკრეტულად?

პასუხისმგებლობის საკითხი დადგება ყველა იმ ადამიანის, ვინც მსგავს უკანონობაში შეიძლება რომ მონაწილე ყოფილიყო, მაგრამ კიდევ ერთხელ ვამბობ, რომ ასე “თუ”–ებით საუბარი ახლა საფუძველს მოკლებულია იმიტომ, რომ აბსოლუტარად დარწმუნებული ვარ: ვანო მერაბიშვილი იტყუება და ამის თქმის საფუძველს მაძლევს ყველაფერი, რაც ამ კაცს უკავშირდება ჩვენს ქვეყანაში. არც ერთი მიზეზი არ მაქვს, რომ მისი რომელიმე სიტყვის მჯეროდეს.

ბოლოს ისევ მინდა გკითხოთ, ვინ უნდა ჩაატაროს გამოძიება ამ საქმეზე…

ჩვენ ვლაპარაკობთ იმაზე, რომ უნდა აღიძრას სისხლის სამართლის საქმე და ამოღებული უნდა იქნას მთავარი მტკიცებულება. ფარცხალაძეზეა მთავარი ბრალდება, ჭიკაიძეზე თუ სოზარ სუბარზე, ამას რა მნიშვნელობა აქვს?! ჩვენ ხომ არ ვლაპარაკობთ იმაზე, რომ უნდა ჩატარდეს იმ ტიპის გამოძიება, რომელსაც შეფასებები სჭირდება. ჩვენ ვლაპარაკობთ იმაზე, რომ ფორმალური წესი და კანონი უნდა იყოს დაცული ფირის ამოღებისას. მე ვერანაირ პრობლემას ვერ ვხედავ, თუ პროკურატურა ამოიღებს ამას, ვინც გინდა იმან ამოიღოს, მთავარია, ეს იყოს კანონით დადგენილი წესით გაკეთებული, სისხლის სამართლის საქმე აღიძრას ამ ფაქტზე და ყველაფერი ნათელი გახდეს.

ამ გამოძიების პერიოდში უნდა შეუწყდეთ თუ არა უფლებამოსილება სუბარს და ფარცხალაძეს?

რა თქმა უნდა, უნდა დარჩეს უფლებამოსილება. ვანო მერაბიშვილმა რაღაც ბრალი წაუყენა ვინმეს, ეს არ ნიშნავს იმას, რომ 2 მინისტრი უნდა გადადგეს.

ვერ ხედავთ იმის საფრთხეს, რომ შესაძლო მტკიცებულებების ფალსიფიკაცია მოხდეს ამ მინისტრების პირობებში?

ამას ვნახავთ. მე აბსოლუტურად გამოვრიცხავ იმას, რომ ყოფილმა სახალხო დამცველმა მტკიცებულებების ფალსიფიკაცია მოახდინოს, მაგრამ თუ, ღმერთმა დაიფაროს და, ასეთი რამ მოხდა, ამას ყველა ვნახავთ. პასუხისმგებლობის საკითხის დაყენება ყველაზე ადვილია, ხომ? არავითარი თეორიული საფუძველიც კი არ არსებობს მსგავსი ბრალდების წაყენებისთვის სოზარის მიმართ.

ფარცხალაძის მიმართ?

ამ შემთხვევაში ჩვენ ხომ სოზარზე ვლაპარაკობთ, იმიტომ, რომ ეს თუ მოხდება, უნდა განხორციელდეს სასჯელაღსრულების მინისტრის თანხმობით, ხომ?! მისი სისტემიდან უნდა მოხდეს ფირის ამოღება. აქ ფარცხალაძეზე არ ვლაპარაკობთ ჩვენ, ვლაპარაკობთ სოზარზე და ეს არის აბსოლუტურად გამორიცხული.

ფარცხალაძესაც ისევე ენდობით, როგორც სუბარს?

სოზართან მე ძალიან ბევრი წელი მაკავშირებს და, რა თქმა უნდა, ნდობას ვუცხადებ. ფარცხალაძეს არ ვიცნობ, ამიტომ ასე გამიჭირდება ამაზე საუბარი, რა თქმა უნდა, მაგრამ ნამდვილად ვენდობი, იქიდან გამომდინარე, რომ მასზე პასუხისმგებლობა აღებული აქვს საქართველოს პრემიერ–მინისტრს, რომელსაც სრულ ნდობას ვუცხადებ.