ბატონო პაატა, ალბათ, საქმის კურსში ხართ ადიგენის რაიონში მიმდინარე მოვლენებთან დაკავშირებით და როგორია თქვენი შეფასება?
როგორც ჩვენ ინფორმაცია გვაქვს ადგილობრივი ხელისუფლებიდან, ეს მინარეთი მშენებლობის პროცესში იყო და როგორც ჩანს, [მშენებლობა] უკანონოდ მიმდინარეობდა… შეიძლება ვცდები, მაგრამ როგორც ჩვენ გვაქვს ინფორმაცია, რაღაც წინასწარ განზრახვით იყო… განბაჟების დროს შემოტანილი იყო და არასწორად იყო დოკუმენტაცია გაფორმებული. თურქეთის მხარეს არსებულ დოკუმენტებში წერია მინარეთი და უკვე ქართულ მხარეს გადმოტანილ დოკუმენტებში წერია სამშენებლო მასალა, ანუ არ არის მინიშნებული მისი სტატუსი, თუ შეიძლება ასე ითქვას, ამ სტრუქტურებისა რაც იქნა გადმოტანილი. ეს არ ყოფილა შეთანხმებული ადგილობრივი თვითმართველობის ორგანოებთან ისე როგორც წესი და რიგია და როგორც საერთოდ ნებისმიერი შენობა უნდა შენდებოდეს საქართველოში… ეს ადგილობრივი თვითმმართველობების პრეროგატივაა და არა ცენტრალური ხელისუფლების. ძალიან სწრაფ პერიოდში, ზუსტად არ ვიცი რამდენად სწორია ეს ინფორმაცია, მაგრამ შეიძლება ერთ ღამეშიც კი მოულოდნელად იქნა მინარეთი მიშენებული იმ მეჩეთზე, რომელზეცაა საუბარი. ამიტომ, როგორც მე ვიცი, 2 თვის განმავლობაში თვითმმართველობის ორგანოებს მიუციათ გონივრული ვადა, რათა აღმოეფხვრათ ეს უკანონო მშენებლობა და თვითონვე მოეხდინათ დემონტაჟი მათ, ვინც მონტაჟი მოახდინეს და ვინაიდან მათ დემონტაჟი არ განახორციელეს, და ჯერ კიდევ მშენებლობის პროცესში იყო ეს ყველაფერი, ამიტომ, ადგილობრივმა თვითმმართველობამ როგორც მე ვიცი, მიიღო გადაწყვეტილება თავისი ლეგიტიმური უფლებიდან გამომდინარე განახორციელა კონსტიტუციით დადგენილი უფლებამოსილება და არ დაუშვა უკანონო მშენებლობა.
ანუ თქვენ აცხადებთ, რომ აქ არ ყოფილა რაიმე სახის რელიგიური მოტივი?
რელიგიური მოტივი ვერ იქნებოდა, იმიტომ, რომ ნებისმიერი უკანონო მშენებლობა… ნებისმიერ ადგილზე (თბილისი იქნება ეს თუ რეგიონები) გვინახავს როგორ ხდება უკანონო შენობის დემონტაჟი. სამწუხაროდ, ასეთი ფაქტები ხდება ხოლმე, ამიტომ, ჯობდა გარკვეული პროცედურა გავლილი ყოფილიყო, რათა ეს შენობა ნორმალურად აშენებულიყო. საქართველოს ტერიტორიაზე ბევრი მეჩეთიც არის და მინარეთიც, მე არ მგონია, რომ მაინცდამიანც ამ მინარეთის მიმართ იყოს განსაკუთრებული ვნებათაღელვეა. გვაქვს საფუძველი ვიფიქროთ, რომ ადგილიდან ჩვენთვის მოწოდებული ინფორმაცია სიმართლეს შეესაბამება.
ბატონო პაატა, იგივე რეაქცია ექნებოდა სახელმწიფოს ამ შემთხვევაში, რომ “უკანონო მშენებლობა” არა მეჩეთს და მინარეთს, არამედ სხვა, მაგალითად მართლმადიდებლურ ეკლესიას უკავშირდებოდეს?
აქ საუბარი არის ადგილობრივი თვითმმართველობის ორგანოებზე…
თქვენი აზრი გვაინტერესებს, იგივე იქნებოდა რეაქცია?
ჩემი აზრი როგორც მინისტრის გაინტერესებთ, ხომ… თქვენ როგორც მინისტრს მელაპარაკებით, ხომ ასეა? მე გეტყვით, რომ ეს საკითხები წყდება ადგილზე ადგილობრივი თვითმმართველობის მიერ. მათ შეეძლოთ მიეღოთ როგორც ერთი გადაწყვეტილება ისე მეორე გადაწყვეტილება. მათ შეეძლოთ დაეკანონებინათ უკანონო მშენებლობა, ან მიეღოთ ის გადაწყვეტილება, რაც გააკეთეს. მათი პრეროგატივაა ეს. ალბათ, გახსოვთ ბათუმთან ახლოს სააკაშვილმა დაანგრია მშენებარე ეკლესია… რა საფუძვლით დაანგრია გახსოვთ? – უკანონო მშენებლობის საფუძველით. ანუ საფუძველი მისცეს… საფუძველი იქნა მიცემული… ხელისუფლებას შეუძლია დააკანონს ეს შემდგომ, მის ხელშია მისი ძალაუფლებაა ეს, ან ჩათვალოს, რომ უკანონო მშენებლობა უნდა აღიკვეთოს.
რა უნდა გაკეთდეს იმისთვის, რომ არ მოხდეს ვითარების ესკალაცაია?
იმისათვის, რომ ვითარების ესკალაცაია არ მოხდეს, საჭიროა წინასწარ ხორციელდებოდეს ასეთი სერიოზული საკითხები. ეს მინარეთი როგორც ჩანს, დამონტაჟდა ორი თვის უკან. შესაბამისად, ეს მოხდა უკვე იმ ესკალაციის ფონზე, რაც ზოგადად არჩევნების და ახალი ხელისუფლების გამარჯვების შემდეგ ხელოვნურად იქმნება ისლამსა და სახელმწიფოს შორის. არაერთი ფაქტი გვაქვს ამის. პირადად მე მქონდა საუბარი თითქმის ყველა რელიგიურ ლიდერთან, ისლამური ჯგუფების… ყველასთან მქონდა მკაფიო თხოვნა, რომ ოპოზიცია ძალიან ბოროტად და პოლიტიკურად იყენებს ისლამის თემას, ამიტომ თხოვნა მქონდა ყველასთან, რომ ძალიან გთხოვთ, როგორმე ყველა მოქმედება გადავიტანოთ მას შემდეგ, რაც სააკაშვილი არ იქნება პრეზიდენტი, არჩევნების შემდეგ.
ოპოზიციაში ნაცმოძრაობას გულისხმობთ ალბათ?
დიახ.
თქვენ ამბობთ, რომ მათ [ნაცმოძრაობის] მიერ არის ინსპირირებული ეს თემა?
არა, მე ამას არ ვამბობ… მე ვამბობ, რომ ჯობია, რაღაც მოქმედებები არ განგვეხორციელებინა… მითუმეტეს ისინი, რომლებიც კანონს არ შეესაბამება. ამიტომ, მე მაინც მერჩივნა, რომ ასეთი ღონისძიებები კანონთან იყოს შეთანხმებული, არა ფარულად, არა განბაჟების დოკუმენტის არასწორად შედგენაში, არა ერთ ღამეში აშენებაში, არამედ ყოფილიყო როგორც არის წესით და რიგით, დღისით–მზისით გაკეთებულიყო ყველაფერი შესაბამისი დოკუმენტების წარმოდგენით. მე მოვუწოდებ ყველას, მოდით, ისედაც დაძაბულ ფონს კიდევ უფრო ნუ ვძაბავთ მოულოდნელი და ფაქტის წინაშე დაყენებითი რაღაც ნაბიჯებით. ეს ეხება ყველას და არამარტო მუსლიმ ორგანიზაციებს… ყველას ეხება აბსოლუტურად. აშკარად ვიღაც–ვიღაცები ამას იყენებენ… შეიძლება ვიღაცამ გულწრფელად გააკეთა ეს, მე ვერავის ვერაფერს დავაბრალებ – შეიძლება, ადამიანებმა გულწრფელად, მაგრამ არასწორად შეავსეს საბაჟო დეკლარაცია, შეიძლება გულწრფელად ღამით მოინდომეს ამ მინარეთის აშენება კანონის გვერდის ავლით, შეიძლება ამაში არაფერი უარყოფითი მოტივაცია არ არის, მე ვერავის ვერაფერს დავაბრალებ, მაგრამ შეიძლება ეს გულწრფელი გადაცდომები ვიღაცამ გამოიყენოს არაგულწრფელ პოლიტიკურ კონტექსტში და ამის მაგალითები საქართველოში უამრავი გვაქვს ბოლო თვეების განმავლობაში. ამიტომ, ყველას ვთხოვდი, მოდით დაველოდოთ, როცა დალაგდება სიტუაცია საქართველოში, როცა ხელისუფლება სრულებით იქნება აღებული ერთი პოლიტიკური ძალის მიერ და სხვას არ ექნება საშუალება ეს პოლიტიკური კონიუნქტიურისთვის გამოიყენოს, შემდეგ უკვე ამ საკითხებს მშვიდად მივხედოთ.
რაც შეეხება ადგილობრივი მუსლიმების განცხადებას, რომლებიც ამბობენ, რომ დღეს დაირღვა მათი უფლებები, მოხდა პოლიციის მხრიდან ადამიანების ცემა, უკანონო დაკავება და ასე შემდეგ…
ამის გადამოწმებაა საჭირო. პოლიცია აცხადებს, რომ არავისთვის მიუყენებია ფიზიკური შეურაცხყოფა. მე იქ არ ვყოფილვარ, ამიტომ, მე ვერც თქვენ სიტყვას ვერ ვენდობი და ვერც სხვა სიტყვას. უნდა ჩატარდეს შესაბამისი გამოძიება. ნებისმიერ შემთხვევაში, ასე მოხდა თუ ისე, მაინც უნდა გაეცეს კითხვებს პასუხი: რატომ მოხდა არასწორად საბაჟო დოკუმენტების შედგენა, რატომ წერია თურქულ დოკუმენტებში მინარეთი და ქართულ დოკუმენტებში ამოღებულია ეს ტერმინი. რატომ მოხდა ჩუმად, ფარულად, ადგილობრივი თვითმმართველობის ორაგნოებთან შეთანხმების გარეშე ეს მშენებლობა. შემდეგ როცა მათ მიეცათ გონივრული ვადა- ორი თვე გამოესწორებინათ ხარვეზი და გაეკეთებინათ დემონტაჟი, მათ ეს არ გააკეთეს და როცა ადგილობრივმა ხელისუფლებამ მისთვის კანონით მინიჭებული უფლებამოსილებით დაიწყო კანონის რეალიზაცია, მაშინ აცხადებენ, რომ ეს არის მუსლიმების უფლებების დარღვევა. კითხვები არსებობს სამწუხაროდ. კითხვები რომ არ არსებობდეს, ჯობია ასეთი საკითხების წინასწარ კანონის ფარგლებში მოგვარება და არა ფაქტის წინაშე დაყენება.
თქვენ საუბრობთ იმის შესახებ, თუ რა არ უნდა მომხდარიყო, მაგრამ მოხდა ის, რაც მოხდა. დღეს არსებობს ფაქტი. ფიქრობთ თუ არა, რომ სახიფათო ტენდენციაა ქვეყნისთვის ის, რაც ადიგენში ხდება?
მე არ ვთვლი ასე. მე მგონია, როგორც კი ქვეყანაში პოლიტიკური სიტუაცია დალაგდება ეს ტენდენციებიც ალაგდება. იმიტომ, რომ აშკარად ვიღაცები ხელს ითბობენ ასეთ მოვლენებზე.
ვის გულისხმობთ?
არ ვიცი. ვიღაცები. ამას სჭირდება გამოძიება. აშკარაა, რომ ტენდენციაა არის იმისა… რომ ვიცოდე ვინ, გეტყოდით, არავითარი პრობლემა არ მქვს, მაგრამ დარწმუნებული ვარ, რომ ეს ვიღაცები არჩევნების შემდეგ აორთქლდებიან, მათ ხელიდან გაეშვებათ ის სადავეები, რომლითაც ცდილობდნენ ტემპერატურის აწევას. ვიღაცაზე რომ გითხრათ, ხომ უნდა დაგიმტკიცოთ, არა? ჩემი განწყობაა, რომ ეს სიტუაცია, ქვეყანაში ისლამური თემა შეგნებულად, ხელოვნურად იმართება.
როგორ წარმოგიდგენიათ ახლა ამ პრობლემის გადაჭრა. ადამიანები ამ დრომდე შეკრებილები არიან იქ, მიმდინარეობს აქცია. თუ აპირებს თქვენი სამინისტროს წარმომადგენელი, ან პირადად თქვენ ადგილზე ჩასვლას?
არა, ჯერ არ ვფიქრობ ჩასვლას. მე ველოდები როგორ დასრულდება ყველაფერი. მე ვენდობი ძალოვან სტრუქტურებს. ჯერჯერობით აშკარად ყველაფერი კანონის ფარგლებში ხორციელდება. მე ვერ ვხედავ კანონიდან გადაცდენას…
პოლიციის მხრიდან?
ადგილობრივი თვითმმართველობის მხრიდან. დემონტაჟი მოხდა კანონის ფარგლებში. არა სწრაფად და მოულოდნელად, არამედ დიდი ხნის განმავლობაში ხდებოდა ლოდინი იმისათვის, რომ თვითონ მოეხდინათ ყველაფერი ეს. შესაბამისად, თუ მეკითხებით, როგორ უნდა მოიქცნენ [აქციის] მონაწილეები, უნდა დაიშალონ აუცილებლად… სახლებში წავიდნენ. უნდა თქვან, რომ მართლაც მათი მოქმედებები არ შეესაბამებოდა კანონს… აწი, მომავალში ისინი ამას გააკეთებენ კანონის ფარგლებში.
