სამების საკათედრო ტაძარში აფხაზეთის ომის დროს ბაბუშერას აეროპორტში თვითმფრინავის აფეთქებისას დაღუპული 10 მებრძოლის სამოქალაქო პანაშვიდი მიმდინარეობს.

დაღუპულების ოჯახის წევრებს საქართველოს პრემიერ-მინისტრმა გიორგი კვირიკაშვილმა, თავდაცვის მინისტრმა თინა ხიდაშელმა, დევნილთა და განსახლების მინისტრმა სოზარ სუბარმა და მთავრობის სხვა წარმომადგენლებმა მიუსამძიმრეს.

სამების საკათედრო ტაძარში აფხაზეთიდან გადმოსვენებული 10 მებრძოლის სამოქალაქო პანაშვიდი 5 მარტს, 12:00 საათზე, გაიმართება. მებრძოლებს სამებიდან 14:00 საათზე გამოასვენებენ. მათ დიღმის ძმათა სასაფლაოზე სამხედრო პატივით 15:00 საათზე დაკრძალავენ.

4 მარტს გავრცელებული ინფორმაციის თანახმად, ლევან სამხარაულის სახელობის ექსპერტიზის ეროვნულ ბიუროში ბაბუშერაში დაღუპული კიდევ 10 მებრძოლის ნეშტია იდენტიფიცირებული, რომლებიც უკვე ოჯახის წევრებს გადასცეს.

2010 წელს წითელი ჯვრის ეგიდით შეიქმნა ორმხრივი საკოორდინაციო ჯგუფი, რომელიც 1992-1993 წლებში ქართულ–აფხაზური კონფლიქტის შედეგად უგზო–უკვლოდ დაკარგულთა მოძიების საკითხებს სწავლობს. მოლაპარაკების შედეგად გადაწყდა ბაბუშერას ძმათა სასაფლაოს გახსნა და ცხედრების ექსჰუმაცია.

ბაბუშერას ძმათა სასაფლაოზე სამარხის გახსნის შემდეგ, იდენტიფიცირების მიზნით, ნეშტები ლევან სამხარაულის სახელობის სასამართლო ექსპერტიზის ეროვნულ ბიუროში გადმოასვენეს. საქართველოში ჩატარებული გენეტიკური პროფილები ხორვატიაში, ზაგრების უნივერსიტეტის დნმ ლაბორატორიაში გაიგზავნა. ამ ეტაპზე სულ იდენტიფიცირებულია 31 ნეშტი, აცხადებს სამინისტრო.