5 ივნისს მსოფლიოში გარემოს დაცვის დღე აღინიშნება. გაეროს თანახმად, წელს ამ დღის ფოკუსში პლასტმასის ნარჩენების შემცირებაა.

გარემოს დაცვის დღესთან დაკავშირებით, „აჭარისწყალი ჯორჯიას“ ორგანიზებით, მაღალმთიან აჭარაში მცხოვრები მოსწავლეებისთვის გამოცხადდა კონკურსი, რაც მიზნად ისახავდა გარემოსდაცვითი ცნობიერების ამაღლებას თაობაში, რომელიც უკვე ხვალ წარმართავს რეგიონების განვითარებას და იზრუნებს მასზე.

კონკურსის ფარგლებში მოსწავლეებს უნდა წარმოედგინათ გარემოს დაცვის თემაზე მეორეული ნივთებისა და ნარჩენებისგან შექმნილი მაკეტები.

კონკურსში მონაწილეობა 20-მდე სკოლამ მიიღო, მათგან კი სამი საუკეთესო გუნდი დაჯილდოვდა 5 ივნისს. მოსწავლეებმა მასწავლებლებთან ერთად წარმოადგინეს ნამუშევრები და პრეზენტაციაც გამართეს.

პირველი გამარჯვებული გუნდის მოსწავლეებმა იაგო მიქელაძის სახელობის ბუთურაულის საჯარო სკოლიდან შექმნეს გადამამუშავებელი ქარხნის მაკეტი მთავარი სლოგანით – „არ გადააგდო – გადააკეთე”.

იაგო მიქელაძის სახელობის ბუთურაულის საჯარო სკოლის პირველი გუნდი

გუნდის წევრმა ნინი დიასამიძემ გვითხრა, რომ მისი თაობისთვის მნიშვნელოვანია გარემოს დაცვის საკითხები, რადგან ისინი დგანან რეალური გამოწვევების წინაშე:

„ჩვენ გარემოში შეიძლება განვითარდეს მეწყრული პროცესები და სხვა საფრთხეები, რომლებიც ჩვენს საცხოვრებელ გარემოს დააზიანებს. ამიტომ მნიშვნელოვანია ყველანი ჩართულები ვიყოთ ზრუნვისა და გაფრთხილების პროცესში. ჩვენი პროექტი ეხებოდა ნარჩენების გადამუშავებას და ამით სუფთა გარემოს შენარჩუნებას” – ამბობს ნინი დიასამიძე.

გამარჯვებულებს შორის იყო სოფელ დიდაჭარის საჯარო სკოლის გუნდიც. მათ თავიანთი ოცნება გადაიტანეს მაკეტში და ნარჩენებით მსოფლიოს საოცრებები გააცოცხლეს, ის ადგილები, რომელთა მონახულებაც სურთ.

ასევე, მათ ბოთლის სახურავებისა და პოლიეთილენის პარკებისგან გააკეთეს მსოფლიოს რუკაც, რაც ეხმიანებოდა მთავარ თემას – ეკოსისტემის პლასტმასით დაბინძურებას.

„პრობლემა, რომელიც ჩვენი მაკეტით გამოვსახეთ, არის გარემოს დაბინძურება. როგორც ვიცით, დღეს დედამიწაზე უკვე, დაახლოებით, ექვსი ხელოვნურად შექმნილი ნაგვის კუნძულია, რაც ცოცხალ ბუნებას, როგორც წყალში, ასევე ხმელეთზე, საფრთხეს უქმნის. როგორც ახალგაზრდა თაობას, ძალიან დიდი პასუხისმგებლობა გვაკისრია, რომ მივხედოთ ამ პრობლემებს” – გვითხრა გუნდის წევრმა, ლუკა წულუკიძემ.

დიდაჭარის საჯარო სკოლის გუნდი

„დედამიწა კიდევ მილიონობით წელი იარსებებს, თუმცა, ყველაზე მნიშვნელოვანი არის ის, თუ როგორ გავუფრთხილდებით მას. გვინდოდა ბავშვებისთვის გვეჩვენებინა, რომ უნდა იზრუნონ მასზე და რეალურად გაუფრთხილდნენ ამ მშვენიერებას. მინდა ყველა ადამიანს მოვუწოდო, მიაქციონ ყურადღება იმას თუ რას ხარჯავენ და რისთვის. რეალურად გაიაზრონ, რა საფრთხე შეიძლება მოუტანოს დანაგვიანებამ მსოფლიოს და შეეცადონ, რომ თავიანთი მომავალი თაობებისთვის იბრძოლონ” – ამბობს ანა შავაძე დიდაჭარის სკოლიდან.

იაგო მიქელაძის სახელობის ბუთურაულის საჯარო სკოლიდან მეორე გუნდიც მოხვდა გამარჯვებულთა შორის. გოგონებმა ეკოსოფლის მაკეტი წარმოადგინეს და ისაუბრეს იმაზე, თუ როგორ შეიძლება მოაწყო საცხოვრებელი სივრცე რესურსების გონივრული გამოყენებით.

გუნდის წევრი ლანა დიასამიძე მისი გუნდის ხედვებზე გვესაუბრა:

იაგო მიქელაძის სახელობის ბუთურაულის საჯარო სკოლის მეორე გუნდი

„ჩვენი პროექტის სახელი იყო „ეკოსოფლის მაკეტი“, რაზეც ვიმუშავეთ სამმა ადამიანმა. გამოვიყენეთ მეორადი მასალები, მეორადი ნივთები.

თუ გარემო დაბინძურებული იქნება პლასტმასითა და სხვა ნარჩენებით, დაბინძურდება ჰაერიც, რომელსაც ყველა თანაბრად ვსუნთქავთ. შესაბამისად, ჩვენ უნდა დავიცვათ გარემო იმისათვის, რომ გავუფრთხილდეთ ჩვენს თავსაც. როგორც ჩვენ ვიზრუნებთ ბუნებაზე ისე იზრუნებს ბუნება ჩვენზეც” – ამბობს ლანა დიასამიძე.

კონკურსის ყველაზე პატარა მონაწილეები მესამეკლასელები იყვნენ, რომლებმაც მუყაოთი დაამზადეს სხვადასხვა ნამუშევარი.

კონკურსის ყველაზე პატარა მონაწილეები

„აჭარისწყალი ჯორჯიას“ გარემოსთან შესაბამისობის დეპარტამენტის ხელმძღვანელი ნინო გაგუა გვიყვება, რომ დიდი ჩართულობიდან გამომდინარე, გამარჯვებულების გამოვლენა გაუჭირდათ:

„ჩვენმა კომპანიამ გამოაცხადა კონკურსი მაღალმთიანი აჭარის სკოლებისთვის. მოსწავლეებს მიეცათ დავალება, მოამზადონ პროექტები მეორადი ნივთებისგან, ნარჩენებისგან. ამან დიდი ენთუზიაზმი გამოიწვია ბავშვებში, იყო დიდ ჩართულობა, როგორც მასწავლებლების, ისე მოსწავლეების მხრიდან. ოცმა სკოლამ შემოიტანა განაცხადი”.

„აჭარისწყალი ჯორჯიას“ გარემოსთან შესაბამისობის დეპარტამენტის ხელმძღვანელი ნინო გაგუა

„ძალიან გაგვიჭირდა გამარჯვებულების შერჩევა, თუმცა მაინც გამოვავლინეთ სამი საუკეთესო გუნდი. მათ გადაეცათ სერტიფიკატები და წიგნის მაღაზიის ვაუჩერები. ვფიქრობ, მოსწავლეების ცნობიერების ამაღლების კუთხით ეს იყო მნიშვნელოვანი ღონისძიება.

მოსწავლეები კიდევ ერთხელ დაფიქრდნენ იმაზე, თუ რამდენად მნიშვნელოვანია ნარჩენების წარმოშობის შემცირება, მათი მეორადი გამოყენება რითაც ნაკლებ ზიანს მივაყენებთ გარემოს” – ამბობს ნინო გაგუა.

5 ივნისს, გამარჯვებული გუნდების დაჯილდოების დღის ბოლოს, შუახევი ჰესის ინჟინერთან ერთად მოსწავლეებმა ჰესი დაათვალიერეს, ნახეს, თუ როგორ გარდაიქმნება წყლის ენერგია ელექტროენერგიად და გაეცნენ კომპანიის მიერ დანერგილ შრომის უსაფრთხოების სტანდარტებსაც.