საპროკურორო საბჭოს გადაწყვეტილებით, გენერალური პროკურორის კანდიდატად პარლამენტს გიორგი გაბიტაშვილი წარედგინება.
გიორგი გაბიტაშვილი გენერალური პროკურორის მოქმედი მოადგილეა.
გენერალური პროკურორობის კანდიდატის შესარჩევად საპროკურორო საბჭომ კენჭისყრა დღეს, 11 ივლისს, ჩაატარა.
საპროკურორო საბჭოს სხდომაზე ცალ-ცალკე კენჭი ეყარა სამ კანდიდატს: გიორგი გაბიტაშვილს, დარეჯან ბუცხრიკიძეს და ვიქტორ ახალბედაშვილს. ბუცხრიკიძის და ახალბედაშვილის კანდიდატურას მხარი არავინ დაუჭირა, ხოლო გაბიტაშვილმა 11 ხმა მიიღო.
კენჭისყრის შედეგები
- 2013 წლის 13 ივნისიდან დღემდე გიორგი გაბიტაშვილი საქართველოს გენერალური პროკურორის მოადგილის პოსტს იკავებდა.
- გიორგი გაბიტაშვილმა მუშაობა დაიწყო 2007 წელს საქართველოს პროკურატურაში სტაჟირების პროგრამით. სტაჟირების დასრულების შემდეგ დაინიშნა პროკურორად შიდა ქართლისა და მცხეთა-მთიანეთის საოლქო პროკურატურაში.
- 2009 წელს გიორგი გაბიტაშვილი დააწინაურეს შიდა ქართლისა და მცხეთა-მთიანეთის საოლქო პროკურატურაში შინაგან საქმეთა სამინისტროს ორგანოებში გამოძიების საპროცესო ხელმძღვანელობის განყოფილების უფროსად, სადაც საქმიანობდა 2013 წლამდე.
- 2013 წლის 14 იანვრიდან გიორგი გაბიტაშვილმა პროფესიული საქმიანობა გააგრძელა საქართველოს ფინანსთა სამინისტროს საგამოძიებო სამსახურის დეპარტამენტის უფროსის თანამდებობაზე.