სომხეთის პრემიერ-მინისტრი ნიკოლ ფაშინიანი და აზერბაიჯანის პრეზიდენტი ილჰამ ალიევი 12 ნოემბერს დუბლინში, ევროპის პოლიტიკური გაერთიანების მე-9 სამიტის ფარგლებში შეხვდნენ.
სომხეთის პრემიერ-მინისტრის ადმინისტრაციის ინფორმაციით, შეხვედრაზე ლიდერებმა სომხეთსა და აზერბაიჯანს შორის სამშვიდობო პროცესის გაღრმავებისა და ორ ქვეყანას შორის თანამშრომლობის განვითარების საკითხები განიხილეს.
ოფიციალური ცნობით, ერთ-ერთი თემა ელექტროენერგეტიკული სისტემების დაკავშირება იყო. მხარეებმა ასევე ისაუბრეს სატრანსპორტო და სატრანზიტო კავშირების განვითარებაზე, ეკონომიკურ და სავაჭრო ურთიერთობებზე, საზღვრების დელიმიტაციასა და ნდობის განმტკიცების ღონისძიებებზე.
როგორც სომხური მედია წერს, შეხვედრაზე განიხილეს „ტრამპის მარშრუტის საერთაშორისო მშვიდობისა და კეთილდღეობისთვის“ (TRIPP) პროექტის განხორციელების საკითხიც, მათ შორის მისი სარკინიგზო და საავტომობილო მონაკვეთების დაგეგმვა და ამ მარშრუტით სატრანზიტო მიმოსვლის პერსპექტივები.
სომხეთის პრემიერ-მინისტრის ადმინისტრაციის ცნობით, დადებითად შეფასდა აზერბაიჯანის გავლით სომხეთში და სომხეთიდან ტვირთების ტრანზიტიც – გასული წლის ნოემბრიდან ამ გზით სომხეთში, ჯამში, 105 000 ტონა ტვირთი გადაიზიდა.
“ფაშინიანმა და ალიევმა ასევე ხაზი გაუსვეს გარემოს დაცვისა და ტრანსსასაზღვრო წყლის რესურსების მართვის სფეროში თანამშრომლობის მნიშვნელობას. მხარეებმა დაადასტურეს სამშვიდობო პროცესში არსებული დადებითი დინამიკის შენარჩუნებისა და დიალოგის გაგრძელების აუცილებლობა”.
