ფინანსთა სამინისტროს საგამოძიებო სამსახურმა ბრალი წარუდგინა ერთ პირს, რომელსაც იმერეთში მოწყობილ საამქროში Adidas-ის ყალბი სპორტული ფეხსაცმლის დამზადებას ედავებიან.
საგამოძიებო სამსახურის ცნობით, გამოძიება მიმდინარეობს სისხლის სამართლის კოდექსის 196-ე
მუხლის პირველი ნაწილით, რაც სხვისი სასაქონლო ნიშნის მართლსაწინააღმდეგო გამოყენებას გულისხმობს. დამტკიცების შემთხვევაში, დანაშაული 2 წლამდე პატიმრობას ითვალისწინებს.
„გამოძიებით დადგინდა, რომ ბრალდებულს იმერეთის რეგიონში მოწყობილი ჰქონდა საამქრო, სადაც დაქირავებული პირების მეშვეობით აწარმოებდა და რეალიზაციას უწევდა Adidas-ის სასაქონლო ნიშნით უკანონოდ ნიშანდებულ სპორტულ ფეხსაცმელს.
საგამოძიებო მოქმედებების შედეგად, ამოღებულია სარეალიზაციოდ გამზადებული Adidas-ის სასაქონლო ნიშნით უკანონოდ ნიშანდებული 6 000 ლარის ღირებულების 100 წყვილი სპორტული ფეხსაცმელი, ასევე ამოღებულ იქნა Adidas-ის დიდი ოდენობით სასაქონლო ნიშანი და სპეციალური ბრენდირებული შტამპი“ ,— აცხადებს საგამოძიებო სამსახური.
