ზემოხსენებულ კონკურსში ნომინანტად საქართველოს პარლამენტის ინტერ-ფრაქციული სამუშაო ჯგუფი არასამთავრობო ორგანიზაცია ინფორმაციის თავისუფლების განვითარების ინსტიტუტმა (IDFI) წარადგინა, რომელიც სამოქალაქო საზოგადოების წარმომადგენლებით დაკომპლექტებული ღია პარლამენტის სამუშაო ჯგუფის კოორდინატორია.
“სამი ნახევარფინალისტიდან (საქართველო, კოსტა რიკა და სიერა ლეონე) გამარჯვებული ხმის მიცემის პროცედურის შედეგად გამოვლინდა. ხმის მიცემა შესაძლებელი იყო მითითებულ ბმულზე – https://review.wizehive.com/voting/ogp-champions“, – ნათქვამია IDFI-ს განცხადებაში.
Congratultions #Georgia for winning the first OGP Government Champions Award! #OGP15 @OGPGeorgia pic.twitter.com/w03ZVLdqUw
— Open Gov Partnership (@opengovpart) October 27, 2015
ორგანიზაციის ცნობით, 28 – 29 ოქტომბერს მექსიკის დედაქალაქ მეხიკოში გაიმართება ,,ღია მმართველობის პარტნიორობის გლობალური სამიტი მექსიკაში 2015″. სამიტზე სამოქალაქო საზოგადოების, ბიზნესსექტორისა და მთავრობის 1500-მდე წარმომადგენელი შეიკრიბება. სამიტში მონაწილეობას მიიღებენ სახელმწიფო და არასამთავრობო ორგანიზაციების წარმომადგენლები საქართველოდან, მათ შორის იქნებიან ინფორმაციის თავისუფლების განვითარების ინსტიტუტის (IDFI) დელეგატები, დირექტორი – გიორგი კლდიაშვილი, თავმჯდომარე – ლევან ავალიშვილი და პროექტის კოორდინატორი – დავით მაისურაძე.
“სამუშაო შეხვედრებისა და პანელური დისკუსიების მეშვეობით სამიტის მონაწილეებს საშუალება ექნებათ საკუთარი ქვეყნების მაგალითი და გამოცდილება გაუზიარონ ერთმანეთს, ისაუბრონ საჯარო სერვისების გაუმჯობესებაზე, მთავრობის ანგარიშვალდებულების გაზრდაზე მოქალაქეების მიმართ, სამოქალაქო ჩართულობისა და ინოვაციების ხელშეწყობაზე. ამასთანავე, სამიტზე მონაწილეები განიხილავენ ღია მმართველობის პარტნიორობის როლს გაეროს 2030 წლის მდგრადი განვითარების მიზნების განხორციელებაში.
აღსანიშნავია, რომ IDFI-ის დირექტორი, გიორგი კლდიაშვილი მონაწილეობას მიიღებს შემდეგ სესიებსა და პანელურ დისკუსიებში:: ,,ღია მმართველობის პარტნიორობის სამოქალაქო საზოგადოების ცოდნის გაზიარება”, ,,ეროვნული სამოქმედო გეგმის შემუშავებისთვის მთავრობასთან თანამშრომლობა” და ,,ღია პარლამენტის სამოქმედო გეგმა – იდეებიდან განხორციელებამდე”. IDFI-ის თავმჯდომარე, ლევან ავალიშვილი ისაუბრებს ,,მოქალაქეზე ორიენტირებულ ანტი-ორუფციულ ინიციატივებზე”. ასევე, სამიტზე გამომსვლელთა შორის წარდგებიან იუსტიციის სამინისტროს ანალიტიკური დეპარტამენტის წარმომადგენლები – ქეთევან ცანავა და ზურაბ სანიკიძე, და საერთაშორისო გამჭვირვალობა – საქართველოს აღმასრულებელი დირექტორის მოადგილე – გიორგი ონიანი. ასევე, IDFI-იმ დონორი ორგანიზაციების: UNDP-სა და EU-ს მხარდაჭერით უზრუნველყო პარლამენტარი თამარ კორძაიასა და საქართველოს პარლამენტის საზოგადოებასთან ურთიერთობისა და ინფორმაციის დეპარტამენტის უფროსის ნინო ბერაძის მექსიკაში გამართულ სამიტზე დასწრება.
,,ღია მმართველობის პარტნიორობის გლობალური სამიტი მექსიკაში 2015″ იქნება არა მხოლოდ გამოცდილებისა და იდეების გაზიარების შესაძლებლობა, არამედ სამიტი ხელს შეუწყობს OGP-ის წევრ სახელმწიფოებსა და მათ წარმომადგენლებს შორის მომავალ თანამშრომლობას.
აღსანიშნავია, რომ ღია მმართველობის პარტნიორობა (OGP) მრავალმხრივ ინიციატივას წარმოადგენს; პროექტი მიზნად ისახავს სახელმწიფოს მხრიდან კონკრეტული ვალდებულებების შესრულებას ღია მმართველობის, გამჭვირვალობის, მოქალაქეების ჩართულობის განვითარების, კორუფციასთან ბრძოლის, ინოვაციებისა და ახალი ტექნოლოგიების დანერგვის თვალსაზრისით. ინიციატივას საფუძველი ჩაუყარა რვა დამფუძნებელმა მთავრობამ, მათ შორის აშშ-მა და გაერთიანებულმა სამეფომ. ამჟამად ღია მმართველობის პარტნიორობის ინიციატივა 66 წევრ ქვეყანას აერთიანებს.
საქართველო OGP-ის წევრი 2011 წელს გახდა და ქვეყნის მიერ მიღწეული წარმატების გამო ღია მმართველობის კუთხით 2014 წლის დეკემბერში საქართველო ღია მმართველობის პარტნიორობის მმართველი კომიტეტის წევრად აირჩიეს ორი წლით.
2014 წლიდან კი IDFI ახორციელებს პროექტს ,,ღია მმართველობის ინიციატივაში” საქართველოს პარლამენტის ჩართულობის მხარდაჭერას,” რომელიც დაფინანსებულია და ხორციელდება გაეროს განვითარების პროგრამისა (UNDP) და ევროკავშირის (EU) მხარდაჭერით. პროექტის მიზანია საპარლამენტო ღიაობის, გამჭვირვალობის უზრუნველყოფა და საკანონმდებლო პროცესებში მოქალაქეთა ჩართულობის ხელშეწყობა.
საქართველოს პარლამენტი ღია მმართველობის პარტნიორობას 2015 წლის 30 აპრილს შეუერთდა. საპარლამენტო ღიაობის მემორანდუმზე ხელმოწერის შედეგად საქართველო რეგიონში პირველი ქვეყანა გახდა, რომელმაც პარლამენტში ღია მმართველობის პრინციპების დანერგვა დაიწყო. 2015 წლის 17 ივლისს კი პარლამენტის ბიურომ დაამტკიცა ,,საქართველოს ღია პარლამენტის სამოქმედო გეგმა 2015-2016“, რომელიც საქართველოს პარლამენტის ინტერ-ფრაქციულმა ჯგუფმა და ღია პარლამენტის სამუშაო ჯგუფმა შეიმუშავა. გეგმა 18 ვალდებულებისგან შედგება და 2015-2016 წლებზეა გათვლილი.
საქართველოს OGP-ში ჩართულობის კუთხით ასევე აღსანიშნავია 14-15 სექტემბერს თბილისში, საქართველოს პარლამენტის სასახლეში ჩატარებული ღია მმართველობის პარტნიორობის (OGP) საკანონმდებლო ღიაობის სამუშაო ჯგუფის ორდღიანი კონფერენცია სახელწოდებით- ,,ღიაობის ვალდებულება: პარლამენტის სამოქმედო გეგმები, სტანდარტები და მეთოდები”. კონფერენციაში მონაწილეობას 32-მდე ქვეყნის უცხოელი დელეგატი, საქართველოს პარლამენტისა და მთავრობის წარმომადგენლები, საქართველოში არსებული საერთაშორისო ორგანიზაციებისა და არასამთავრობო ორგანიზაციების წარმომადგენლები იღებდნენ”, – აცხადებენ ორგანიზაციაში.
