საქართველოს ენერგეტიკის სამინისტროს აღნიშნულ შეხვედრასთან დაკავშირებით განცხადება ან კომენტარი არ გაუკეთებია.

 

ოფიციალური ცნობით, გაზპრომსა და ქართულ მხარეს შორის ერთ-ერთი ბოლო შეხვედრა 25 სექტემბერს ბრიუსელში გაიმართა. ენერგეტიკის სამინისტროს პრესსამსახურის ცნობით, მასზე 2015-16 წლების ზამთრის სეზონთან დაკავშირებული მოსამზადებელი სამუშაოები, ასევე სომხეთში გაზის ტრანზიტის საკითხები განიხილეს. სხვა დეტალები შეხვედრის შესახებ უცნობია.

 

გავრცელებულ ინფორმაციას იმის შესახებ, რომ საქართველომ გაზპრომთან მოლაპარაკებები დაიწყო რუსეთიდან გაზმომარაგების მოცულობის გაზრდის მიზნით, საზოგადოების ნაწილში პროტესტი გამოიწვია. მაშინ კახა კალაძის მიერ გაზპრომის საკითხზე გაკეთებული განცხადებები მხოლოდ კომერციულ გაზს არ ეხებოდა. 

 

“ბრიუსელში შეხვედრაზე, რომელიც იყო გამართული, ჩვენ დავსვით საკითხი იმასთან დაკავშირებით, რომ ის მოცულობები, რომელიც დღეს ამ მილსადენში გადის სომხეთის მიმართულებით, რომ იყოს გაზრდილი, რადგანაც ჩვენთვის მნიშვნელოვანია ის, რომ ეს მილსადენი რაც შეიძლება მაქსიმალურად იყოს დატვირთული, რადგან ამ შემთხვევაში ჩვენ უფრო მეტი საშუალება გვექნება დამატებითი მოცულობები მივიღოთ და ასევე, თუ კომერციულ კომპანიებს ექნებათ სურვილი და შესაძლებლობა, მათ შეუძლიათ ბუნებრივი აირი ასევე წამოიღონ რუსეთიდან,” – განაცხადა კახა კალაძემ.

 

განმარტებები რუსეთიდან გაზის მიწოდების შესაძლო გაზრდის თაობაზე წინა კვირაში ენერგეტიკის მინისტრის მოადგილე ილია ელოშვილმაც გააკეთა:

 

“ჩვენ უნდა გამოვიდეთ პრაგმატული ინტერესებიდან და უნდა გავმიჯნოთ ამ შემთხვევაში პოლიტიკა და ეკონომიკა. აქ მთავარი საკითხი არის ის, რომ ჩვენ დივერსიფიცირებულები ვართ გაზის მოწოდების მხრივ, ჩვენ გვაქვს როგორც საკუთარი ტრანზიტული რესურსები, ასევე გვყავს აზერბაიჯანი, როგორც გრძელვადიანი სტრატეგიული პარტნიორი. თუკი გაზპრომიდან იქნება კომერციულად გამართლებული შემოთავაზება, რომელიც ჩვენ წაგვადგება და ჩვენს ეკონომიკას წაადგება და ეს არ დააზიანებს ჩვენს გრძელვადიან პარტნიორულ ურთიერთობებს ჩვენს სტრატეგიულ პარტნიორებთან, ამაში მისასალმებელის გარდა არაფერი არ არის”.