პარლამენტის იურიდიულ საკითხთა კომიტეტზე „რუსული კანონის“ განხილვიდან ოპოზიციონერი დეპუტატები გააძევეს.
კომიტეტის თავმჯდომარის, ანრი ოხანაშვილის გადაწყვეტილებით, სხდომიდან გააძევეს: ლევან ხაბეიშვილი, გიორგი ვაშაძე, პაატა მანჯგალაძე და ხატია დეკანოიძე. მანამდე სხდომიდან ასევე გააძევეს თინა ბოკუჩავა და სალომე სამადაშვილიც.
მოგვიანებით, ანრი ოხანაშვილმა კომიტეტიდან გააძევა კიდევ ერთი ოპოზიციონერი დეპუტატი რომან გოცირიძეც.
„რუსული კანონის“ საკომიტეტო განხილვა დღეს, 15 აპრილს, დილით დაიწყო და განხილვისას სიტუაცია არაერთხელ დაიძაბა. მიუხედავად იმისა, რომ კომიტეტზე მმართველი პარტიის მხრიდან ისმოდა ხმაური და ოპოზიციის მიმართ საპასუხო რეპლიკები, ანრი ოხანაშვილს უმრავლესობის არცერთი წევრისთვის არ მოუწოდებია, რომ სხდომა დაეტოვებინა.
გარდა ამისა, ოხანაშვილი მიკროფონებს უთიშავდა დეპუტატებს, რომლებიც კანონს „რუსულს“ უწოდებდნენ.
