„ქართული ოცნების“ ყოფილი წევრი დიმიტრი ცქიტიშვილი ნეტგაზეთთან აფასებს „უცხოური გავლენის გამჭვირვალობის შესახებ“ კანონპროექტს.

მისი თქმით, აღნიშნული კანონპროექტი იმ სექტორის დისკრედიტაციას ემსახურება, რომელიც ხელისუფლების მიმართ საკმაოდ კრიტიკულია.

„არასამთავრობო სექტორის და მედიების აბსოლუტური უმრავლესობის საქმიანობა არის საკმაოდ ტრანსპარანტული და დამატებითი მექანიზმების გაჩენის საჭიროება არ არის. როგორც თქვეს, სურვილი აქვთ, რომ გარკვეული ინფორმაციები უფრო მეტად თავმოყრილი იყოს. დეკლარაციების წარდგენის ვალდებულება ისედაც აქვთ არასამთავრობო ორგანიზაციებს, რომლებიც ბუღალტერიას აწარმოებენ და იქ შეიძლებოდა დამატებითი საკითხების გაჩენა“, – ამბობს დიმიტრი ცქიტიშვილი.

დიმიტრი ცქიტიშვილის თქმით, როცა ხელისუფლება არასამთავრობო ორგანიზაციებისა და დამოუკიდებელი მედიის კრიტიკას წონიან, არგუმენტს ვერ უპირსპირებს, მათთვის პასუხის გაცემის ნაცვლად უმრავლესობაში მარტივად გადაწყვიტეს,  მათ აგენტები დაარქვან.

„თუმცა ამ კანონპროექტს ვკითხულობდი და ესეც არის ნაჯახით ნამოქმედარი – უზარმაზარი ჯარიმებია. თუ მიზანი არის უბრალოდ ინფორმაციის შეკრება, 20 ათას და 25- ათასიანი ჯარიმები ეგეთ დროს სრულიად არ შეესაბამება. ეს არის დასჯის და რეპრესიული კანონი, 20 და 25 ათასი არასამთავრობო სექტორისთვის, რაც არ უნდა მასშტაბურად დიდი იყოს, ეს არის უზარმაზარი თანხა და, შესაბამისად, ეს არ არის კანონი, რომელიც, როგორც ამბობენ, უბრალოდ, ინფორმაციის თავმოყრისთვის არის საჭირო“, – ამბობს დიმიტრი ცქიტიშვილი.

რაც შეეხება უმრავლესობის მიერ მომზადებული კანონპროექტის „უცხოეთის აგენტების“ შესახებ მსგავსებას რუსულ კანონთან, დიმიტრი ცქიტიშვილის თქმით, უცხოეთის აგენტების შესახებ რუსულ კანონმდებლობას თავად არ იცნობს და, შესაბამისად, უმრავლესობის წევრების კანონპროექტს შინაარსობრივად ვერ შეადარებს.

თუმცა ამბობს, რომ კანონის მიღების კონტექსტი რუსეთსა და საქართველოში ერთნაირია და აქაც ხელისუფლების სურვილია, რომ მოქმედების ინსტრუმენტი გაჩნდეს კრიტიკულ აზრზე, სამოქალაქო სექტორსა და დამოუკიდებელ მედიაზე.

ამასთან, დიმიტრი ცქიტიშვილის თქმით, ხელოვნურია კანონპროექტის ავტორების არგუმენტი, რომ მათ მიერ მომზადებული პროექტი ამერიკულ კანონმდებლობას[FARA] ეყრდნობა და მისი „შერბილებული“ ვერსიაა.

„რაც შეეხება ამერიკულ კანონს, ცოტა სხვა კონტექსტია და შედარება  უადგილოა. ჩვენს შემთხვევაში, როცა ეს ყველაფერი ტრანსპარანტული გვაქვს, როცა ყველაფერი ჩანს და სახელმწიფომ იცის, ვინ არის მტრული სახელმწიფოს მსახური და ვინ არ არის და უბრალოდ ემსახურება იმ დეკლარირებულ პრინციპებს, რომელიც სახელმწიფომ აღიარა, აქ ვფიქრობ, რომ აბსოლუტურად ხელოვნურია. ტაქტიკურად ეს არის, ერთი მხრივ, დისკრედიტაციის მცდელობა არასამთავრობო ორგანიზაციებისა და დამოუკიდებელი მედიის, მეორე მხრივ, დასჯის მექანიზმები, რომელიც საშუალებას მისცემს, რომ პრაქტიკულად შეაჩერონ მათი საქმიანობა“, – ამბობს დიმიტრი ცქიტიშვილი.

რაც შეეხება ტერმინ „აგენტს“, დიმიტრი ცქიტიშვილის თქმით, კანონპროექტის ავტორებმა ამ სიტყვას ნეგატიური კონტექსტი თავად შესძინეს, მიუხედავად მმართველი გუნდის მტკიცებისა, რომ ამ სიტყვაში ცუდი არაფერი არ არის.

„დღეს კი თქვეს, რომ ეს ის  არ არის და სპორტული აგენტიც არსებობს, მაგრამ ის სხვა კონტექსტია და სხვა კონოტაციაა. თვითონ ინიციატორებმა ჩააყენეს ამ აგენტის სტატუსი ნეგატიურ კონტექსტში. ისიც ფაქტია, რომ ანტიდასავლური ტენდენციების პარალელურად შემუშავდა ეს დოკუმენტი და „ხალხის ძალის“ მიერ წარმოჩინდა როგორც დასავლური ქვეყნების ჩვენს სუვერენიტეტში ჩარევისგან თავის დაცვის მექანიზმი. შესაბამისად, ამას აქვს შპიონაჟთან ასოცირების ბუნებრივი მიდრეკილება, ანუ სხვა ქვეყნის ინტერესებზე მომუშავე, არაპატრიოტული განწყობები.

თვითონვე შექმნეს ეს ნეგატიური კონოტაცია, ახლა, ალბათ, მიხვდნენ, რომ ცოტათი ზედმეტი მოუვიდათ და ამიტომ ცდილობენ, რომ შეარბილონ, მაგრამ კანონპროექტი თავისთავად აჩვენებს, რომ ეს არის კუდიანებზე ნადირობის პირველი სამართლებრივი დოკუმენტი საქართველოში“, – განაცხადა დიმიტრი ცქიტიშვილმა.

ამასთან, დიმიტრი ცქიტიშვილის შეფასებით, აღნიშნული კანონპროექტის მიღებით საქართველო არათუ შეასრულებს ევროკომისიის რეკომენდაციებს, არამედ უკან გადადგამს ნაბიჯს. შესაბამისად,  არ გამორიცხავს, რომ საქართველომ კანდიდატის სტატუსიც ვერ მიიღოს.

„მე ვფიქრობ, რომ ის, როგორც მოქმედებს ხელისუფლება, არცერთ შემთხვევაში გვაძლევს ოპტიმიზმის საფუძველს უახლოეს პერიოდში. შესაბამისად, მგონია, რომ ზუსტად იციან, არც ისე მიიღონ კანდიდატის სტატუსი და არც ასე. ამიტომაც ამ კანონით უფრო მეტად ვერ გაფუჭდება მათთვის [შედეგი]. რა თქმა უნდა, ეს კანონი აზიანებს იმ 12 პუნქტიდან ერთ-ერთ საკითხს, მათ შორის ადამიანის უფლებებისა და სიტყვისა და გამოხატვის თავისუფლებას, შესაბამისად, ეს კიდევ უფრო გაფუჭებაა[საქმის] ამ გზაზე“, – ამბობს დიმიტრი ცქიტიშვილი.

დიმიტრი ცქიტიშვილს, რომელმაც თავის დროზე „ქართული ოცნება“ პროპორციული საარჩევნო სისტემის ჩავარდნის გამო დატოვა, ვკითხეთ, ელის თუ არა, რომ დღევანდელ პარლამენტშიც იყვნენ „ქართული ოცნების“ ისეთი დეპუტატები, რომლებიც აღნიშნულ კანონპროექტს მხარს არ დაუჭერენ.

„მას მერე, რაც მე აღარ ვარ „ქართულ ოცნებაში“, რამდენადაც ვხვდები, პარტიული დისციპლინა ბევრად უფრო მკაცრია და გადაწყვეტილებები უფრო ერთსულოვანია. თუმცა ძალიან ბევრი ადამიანი მეგულება, რომელიც, წესით, წინააღმდეგი უნდა იყოს ასეთი ტიპის კანონის. ბევრი მეგულება ასეთი და არ ჩამოვთვლი. მიმაჩნია, რომ ბევრ ადამიანს აქვს სწორი აღქმა, როგორც მინიმუმ, [ხვდებოდნენ] რა არის ეს კანონი.

საბოლოო ჯამში, არ ვიცი, მათი კომპრომისის წითელი ხაზი სადამდე გადის და დაუჭერენ თუ არა ასეთ კანონს მხარს. ძალიან ბევრი ისეთიც ვიცი, რომ ევროპული ღირებულებები და მისწრაფებები მართლაც ორგანული იყო მათთვის და თუ გააცნობიერებენ ამას და დამოუკიდებელ გადაწყვეტილებას მიიღებენ, მე მივესალმები. მე ვფიქრობ, რომ ასეთ დროს მოქმედებებში მეტი დამოუკიდებლობა ძალიან მნიშვნელოვანი იქნება მათთვის, ქვეყნისთვისაც და თუნდაც მმართველი პარტიისთვისაც, საბოლოო ჯამში“, – აცხადებს დიმიტრი ცქიტიშვილი.