რუსეთის პრეზიდენტმა ვლადიმერ პუტინმა ხელი მოაწერა კანონს, რომელიც დივერსიისთვის სასჯელს ამკაცრებს და უვადო თავისუფლების აღკვეთასაც ითვალისწინებს.
ახალი კანონით რუსეთში სისხლის სამართლის კანონით დასჯადი ხდება: დივერსიული საზოგადოების შექმნა, დივერსიების მომზადება და ხელშეწყობა, მათი დაფინანსება და პროპაგანდა.
კერძოდ, დივერსიის წახალისება და დაფინანსება 8-დან 15 წლამდე ან უვადო თავისუფლების აღკვეთას ითვალისწინებს. დივერსიის ხელშეწყობა ისჯება 10-დან 20 წლამდე თავისუფლების აღკვეთით.
კანონი ასევე ითვალისწინებს თავისუფლების აღკვეთას 15-დან 20 წლამდე ან უვადოდ დივერსიის ჩადენის მომზადებისთვის.
კანონის ერთ-ერთმა ავტორმა, სახელმწიფო სათათბიროს უსაფრთხოებისა და ანტიკორუფციული კომიტეტის ხელმძღვანელმა ვასილი პისკარევმა განაცხადა, რომ რუსეთში 2022 წელს დივერსიული აქტების რაოდენობა მკვეთრად – 21-მდე გაიზარდა, მაშინ, როცა 2021 წელს მხოლოდ ერთი დივერსიული აქტი დაფიქსირდა. პისკარევმა დივერსიის გამო უვადო თავისუფლების აღკვეთას სავსებით გამართლებული უწოდა.