ჭიათურაში პრორუსული „ალტ-ინფოს“ პარტიის, „კონსერვატიული მოძრაობის“ ოფისს „პუტინის ოფისი“ დააწერეს.
ოფისის კარზე წითლად არის გადაღებილი სიტყვა „კონსერვატიული“, წითელი საღებავითვეა ორი წარწერა დატოვებული: „პუტინის ოფისი“ და „პრივეტ ბორია“.
ფოტოები ჭიათურელმა აქტივისტმა, ნოდარ ჩაჩანიძემ გაავრცელა ფეისბუკზე.
ამასთან, კარზე გაკრულია წარწერა: „რუსეთის ოფისი“, ხოლო გვერდითა ფანჯარაზე დატანილია აკაკი წერეთლის დიდი ზომის ფოტო და ანტირუსული ლექსი:
რეგიონებში „ალტ-ინფოს“ პარტიის ოფისების გახსნას მოჰყვა ადგილობრივი აქტივისტების პროტესტი არაერთ მუნიციპალიტეტში .
რამდენიმე ქალაქში ოფისები შეღებეს, ზოგგან უკრაინის და ევროკავშირის დროშები დახატეს და ა.შ.
ზოგიერთ შემთხვევაში (მესტიაში, ხულოსა და შუახევში) „კონსერვატიულ მოძრაობას“ საოფისე ფართი დაატოვებინეს.
„ალტ-ინფო“ ტელევიზიაა, რომლის ორგანიზებითაც ჩატარდა 2021 წლის 5 ივლისს ანტი-ლგბტ აქცია, რომელიც ჟურნალისტებზე ძალადობაში გადაიზარდა.
აქციის მიმდინარეობისას სცემეს ტვ პირველის ოპერატორ ლექსო ლაშქარავას, რომელიც მოგვიანებით გარდაიცვალა (შსს მის გარდაცვალებას ნარკოტიკებით ზედოზირებას უკავშირებს).
ტვ „ალტ-ინფო“, რომელიც თავს უწოდებს ალტერნატიული ინფორმაციის წყაროს, მედიამონიტორების შეფასებით, „ანტილიბერალურ, ანტისაიმიგრაციო, ლგბტქი თემის საწინააღმდეგო და ანტიდასავლურ პროპაგანდას ეწევა“.