უკრაინის თავდაცვის მინისტრი ოლექსი რეზნიკოვი აცხადებს, რომ ადგილი, სადაც რუსული სარაკეტო კრეისერი Москва ჩაიძირა, კარგი ადგილი იქნება დაივინგისათვის.

„რუსული ფლოტის „ფლაგმანი“ კარგი ადგილია დაივინგისათვის. კიდევ ერთი სადაივინგე ადგილი გაგვიჩნდა შავ ზღვაში. აუცილებლად ვეწვევი ჩაძირულ ხომალდს ომში გამარჯვების შემდეგ“, – წერს ოლექსი რეზნიკოვი ტვიტერზე.

A “flagship” russian warship is a worthy diving site. We have one more diving spot in the Black Sea now. Will definitely visit the wreck after our victory in the war.
BTW, I already have 300 scuba dives pic.twitter.com/q2Buc51qeI

— Oleksii Reznikov (@oleksiireznikov) April 15, 2022

რუსეთის თავდაცვის სამინისტრომ 14 აპრილს დაადასტურა რუსული სარაკეტო კრეისერის, Москва-ს ჩაძირვა.

13 აპრილს უკრაინულმა მედიამ დაწერა, რომ შავ ზღვაში Москва-ს უკრაინული წარმოების ნეპტუნის რაკეტები მოხვდა, რის გამოც მას ცეცხლი გაუჩნდა.

მოგვიანებით ცეცხლის შესახებ ინფორმაცია რუსულმა სამთავრობო მედიამაც გაავრცელა, თუმცა უკრაინის თავდასხმა არ უხსენებია.

14 აპრილს, გვიან ღამით გავრცელებულ ცნობებში „რია“ წერს, რომ ხომალდი „დეტონაციის“ შედეგად დაზიანდა და შტორმის დროს ჩაიძირა.

უკრაინული Forbes-ის ცნობით, Москва-ს ღირებულება დაახლოებით 750 მილიონი დოლარია და ამ დროისთვის ყველაზე ძვირადღირებული სამხედრო ტექნიკაა, რომელიც უკრაინულმა მხარემ ომში გაანეიტრალა.

ექსპერტების შეფასებით, რუსული სარაკეტო კრეისერის, Moskva-ს დაზიანება არის როგორც სიმბოლური, ასევე სამხედრო ღირებულების მატარებელი, რადგან შავ ზღვაში რუსული ფლოტის ფლაგმანი იყო.