უკრაინის საგარეო საქმეთა სამინისტრო ეხმაურება დე ფაქტო არჩევნებს სამხრეთ ოსეთში და მკაცრად გმობს მას.
უკრაინის საელჩოს მიერ გავრცელებული განცხადების თანახმად, უკრაინის მთავრობა აცხადებს, რომ „არჩევნები“ მიზნად ისახავს რუსეთის ფედერაციის მიერ საქართველოს სუვერენული ტერიტორიის ნაწილის ოკუპაციის ლეგიტიმაციას.
„რუსეთის მიერ საქართველოს ოკუპირებულ ტერიტორიებზე უკანონო კენჭისყრის ჩატარებამ, უკრაინის ტერიტორიაზე რუსული არმიის შემოჭრის გაგრძელების ფონზე, შეიძლება გამოიწვიოს უსაფრთხოების ვითარების მნიშვნელოვანი გამწვავება შავი ზღვის რეგიონში“, – წერია განცხადებაში.
We condemn Russia for organizing unlawful elections in the occupied parts of Georgia. They will have no legal implications. We believe severe sanctions on Russia and their strict implementation will advance the restoration of the territorial integrity of both Georgia and Ukraine.
— Oleg Nikolenko (@OlegNikolenko_) April 10, 2022
უკრაინის მთავრობა აცხადებს, რომ ის მუდმივად მხარს უჭერს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში და მოუწოდებს რუსეთის ფედერაციას, შეასრულოს 2008 წლის 12 აგვისტოს აღებული ვალდებულები და გაიყვანოს შეიარაღებული ძალები საქართველოს ტერიტორიიდან.
განცხადებაში ასევე წერია, რომ რუსეთის ფედერაციის წინააღმდეგ მკაცრი სანქციები ხელს შეუწყობს როგორც უკრაინის, ასევე საქართველოს ტერიტორიული მთლიანობის აღდგენას.
