აქტივისტი სამირა ბაირამოვა, რომელმაც გუშინ მარნეულში “ალტ-ინფოს” პარტიის, პრორუსული “კონსერვატიული მოძრაობის” ოფისის ფანჯრებზე უკრაინისა და ევროკავშირის დროშები დახატა, აცხადებს, რომ მუქარის შემცველ შეტყობინებებს იღებს.
ბაირამოვას თქმით, მას სიცოცხლის მოსპობით ემუქრებიან და აღნიშნავს, რომ პრორუსული ჯგუფებისგან მსგავსი ტიპის მესიჯებს წარსულშიც იღებდა, თუმცა მუქარის განახლებას უკავშირებს სწორედ “კონსერვატიული მოძრაობის” ოფისის ფანჯრების მოხატვას:
„მხოლოდ ფანჯრების მოხატვას არ უკავშირდება, თუმცა დღევანდელ შემთხვევას ამას ვუკავშირებ. ეს ჯგუფები და კონკრეტული ადამიანები ადრეც გვიპირისპირდებოდნენ“, – ამბობს სამირა ბაირამოვა „ნეტგაზეთთან“ საუბრისას.
აქტივისტის თქმით, მომხდართან დაკავშირებით დღის განმავლობაში საქართველოს შინაგან საქმეთა სამინისტროსაც მიმართავს.
“ალტ-ინფოს” პარტიის ოფისების გახსნა მოქალაქეებმა არაერთ ქალაქში სხვადასხვა ფორმით გააპროტესტეს, ზოგიერთ შემთხვევაში კი “კონსერვატიულ მოძრაობას”საოფისე ფართი დაატოვებინეს. ასე მოხდა მესტიაში, ხულოსა და შუახევში.
პარტიაში ამბობენ, რომ მზად არიან რუსეთთან „პარტნიორული ურთიერთობებისთვის“. 14 მარტს კი “კონსერვატიული მოძრაობის” ერთ-ერთმა ლიდერმა “ნეტგაზეთს” უთხრა, რომ პარტია სრული შემადგენლობით გეგმავს რუსეთში ვიზიტს.