პარასკევს, 3 დეკემბერს, ბათუმის ახლად არჩეული საკრებულოს პირველ სხდომაზე ექსპერმიერ გიორგი გახარიას პარტიის „საქართველოსთვის“ წევრები არ მივლენ.
ეს გადაწყვეტილება საზოგადოებას გახარიის პარტიის აჭარის რეგიონული ოფისის ხელმძღვანელმა, ირაკლი მიქელაძემ 2 დეკემბერს, საღამოს საათებში გამართულ ბრიფინგზე გააცნო.
„არ ვაპირებთ არავის სცენარში მონაწილეობის მიღებას“, – განაცხადა პარტიის წარმომადგენელმა.
პარტიის განცხადებით, ისინი აძლევენ „ქართულ ოცნებას“ და ენმ-ს „კიდევ ერთ შესაძლებლობას, რომ თვითონ ერთობლივად მიიღონ ყველა ის გადაწყვეტილება, რაც სჭირდება საკრებულოს და მუნიციპალიტეტის გამართულ ფუნქციონირებას“.
რა მოხდება ახლა?
ბათუმის საკრებულო 35 წევრითაა დაკომპლექტებული.
არჩევნების შემდეგ ენმ-ის დეპუტატი, მაჟორატარი ნუგზარ ფუტკარაძე გარდაიცვალა. მისი გარდაცვალების შემდეგ:
- „ნაციონალურ მოძრაობას“ 14 წევრი დარჩა საკრებულოში,
- „ლელოს“ – 1 წევრი ჰყავს,
- გახარიას პარტიას – 2 წევრი;
- „ქართულ ოცნებას“ – 16 წევრი;
- ასევე, საკრებულოში ირიცხდება 1 დამოუკიდებელი წევრი
- იგულისხმება გახარიას პარტიის მესამე წევრი ირაკლი თავდგირიძე, რომელმაც არჩევნების შემდეგ პარტია დატოვა და თქვა, რომ „ნაციონალურ მოძრაობასთან“ თანამშრომლობა მისთვის მიუღებელია.
უმრავლესობის დაკომპლექტებას და საკრებულოს თავმჯდომარის არჩევას 18 ხმა სჭირდება.
