ახალი ამბები

EU საქართველოსგან 5 ივლისის ძალადობების გამჭვირვალე გამოძიებას მოელის

13 ივლისი, 2021 • 680
EU საქართველოსგან 5 ივლისის ძალადობების გამჭვირვალე გამოძიებას მოელის
ევროკავშირის საგარეო ქმედებათა სამსახურის სპიკერი პიტერ სტანო გამოეხმაურა თბილისში განვითარებულ მოვლენებს, რომელიც უკავშირდება თბილისი პრაიდის მიერ დაგეგმილი “ღირსების მარშის” ჩაშლას, ძალადობრივ საპროტესტო აქციას და ჟურნალისტებზე ძალადობას.
სტანომ თბილისში განვითარებულ მოვლენებს, განსაკუთრებით კი ოპერატორ ლექსო ლაშქარავას გარდაცვალებსა ძალიან სამწუხარო მოვლენა უწოდა.
სტანოს თქმით, ევროკავშირი მოელის, რომ მიმდინარე გამოძიებები წარიმართება გამჭვირვალედ და დამოუკიდებლად. მისი თქმით, საქართველომ, რომელსაც ევროკავშირთან ასოცირების ხელშეკრულება აკავაშირებს, თავად აიღო ვალდებულებები ადამიანის უფლებების დაცვასთან დაკავშირებით. მისი თქმით, ევროკავშირი მხედველობაში მიიღებს განვითარებულ მოვლენებს ორმხრივი დიალოგის ფარგლებში. სტანოს განმარტებით, უმცირესობების უფლებები უნდა იყოს დაცული და გარანტირებული და ეს საქართველოს ხელისუფლების ვალია.

5 ივლისს, თბილისი პრაიდის კვირეულის ფარგლებში დაგეგმილი ღირსების მარშის ჩასაშლელად, საპატრიარქოს ორგანიზებით ჰომოფობიური და ძალადობრივი ჯგუფები რუსთაველის გამზირზე გამოვიდნენ. “ქართული ოცნების” საწინააღმდეგო კარვების, ასევე, “სირცხვილიას” და “თბილისი პრაიდის” ოფისების დარბევის პარალელურად, ჯგუფები განსაკუთრებული აგრესიით მედიის მიმართ გამოირჩეოდნენ.

ჯამში, ამ პირებმა რუსთაველის გამზირსა და მიმდებარე ქუჩებზე 53 ჟურნალისტს სცემეს. რამდენიმე მათგანი ახლაც საავადმყოფოშია.  აგრესიული ადამიანები თავს ესხმოდნენ და ფიზიკურად უსწორდებოდნენ ყველას, ვინც რაიმე ნიშნით – მიკროფონით, კამერითა თუ ფოტოაპარატით – მედიასთან ასოცირდებოდა.

ქალაქის ცენტრში, პოლიციის თანდასწრებით, ჟურნალისტებს უმოწყალოდ სცემდნენ, აგინებდნენ, აპარატურას სტაცებდნენ და უმტვრევდნენ. გარდა მძიმე გამოცდილებისა, რომელიც მედიის წარმომადგენლებმა ძალადობრივი ჯგუფების მოქმედების შედეგად მიიღეს, არაერთი დაზარალებული ხაზს უსვამს უმოქმედობას პოლიციისას, რომელიც 5 ივლისს, მოვლენათა ეპიცენტრში, შესამჩნევად მცირე რაოდენობით იყო წარმოდგენილი.

მასალების გადაბეჭდვის წესი