ჯანდაცვის სამინისტროს 10-წლიანი გეგმის თანახმად, სამედიცინო და ფარმაცევტული საქმიანობის რეგულირების ფუნდამენტური გაძლიერების მიზნით მომზადდა და პარლამენტს განმეორებით წარედგინა საკანონმდებლო ცვლილებები, რაც ჯანდაცვის სექტორს “მნიშვნელოვნად მაღალ დონეზე აიყვანს”. “დარწმუნებული ვარ, პარლამენტის მხრიდან იქნება სრული ჩართულობა და მხარდაჭერა, ვინაიდან ეს არის ერთ-ერთი ის გზა ჯანდაცვის სექტორის მიმართულებით, რომელიც მოგვცემს საშუალებას, შემდგომში გამოვაცხადოთ ამბიციური გეგმა, რომ შეგვიძლია საქართველო ვაქციოთ სამედიცინო ტურიზმის სფეროდ და პაციენტების ექსპორტი (ცოტა ცუდი ფორმულირებაა, მაგრამ დღესდღეობით ნამდვილად ასეა), რომელიც საქართველოდან ხდება, აღარ განხორციელდეს. ხარისხობრივად მნიშვნელოვნად გაუმჯობესებული სექტორის მხრიდან ვიმუშავებთ იმაზე, რომ პირიქით, ჯანდაცვის ტურიზმი დავგეგმოთ საქართველოში, რომელსაც, დარწმუნებული ვარ, დიდი პერსპექტივა გააჩნია ჩვენი რეგიონული მდგომარეობიდან გამომდინარე”, — განაცხადა ეკატერინე ტიკარაძემ. დღესდღეობით, ქართველი პაციენტები სამკურნალოდ ყველაზე ხშირად თურქეთს მიმართავენ რეგიონის ქვეყნებს შორის.