ახალი ამბები

როდის გვექნება ისრაელივით დაცული ცა და კახეთის რკინიგზა – დეპუტატი პრემიერს

25 ივნისი, 2021 • 1775
როდის გვექნება ისრაელივით დაცული ცა და კახეთის რკინიგზა – დეპუტატი პრემიერს

პარლამენტის წევრმა  დავით ზილფიმიანმა პარლამენტში მყოფ ირაკლი ღარიბაშვილსა და მინისტრთა კაბინეტის წევრებს ჰკითხა, როდის გახდება საქართველოს ცა ისრაელივით უსაფრთხო. პლენარულ სხდომაზე გამოსვლისას დეპუტატმა თქვა, რომ თავდაცვის სისტემის აღჭურვა ერთიანი სისტემით უნდა მოხდეს, ასევე უნდა შეიქმნას ისრაელივით დაცული საჰაერო სივრცე, რომელიც “მტრის მფრინავ ობიექტებს არ გააჭაჭანებს.”

“ჩემი კომპეტენციის ფარგლებში მეტნაკლებად ინფორმირებული ვარ და ნამდვილად ამაზე ძლიერი საქართველოს ჯარი არ ყოფილა ტექნიკური თვალსაზრისითაც. მაგრამ ჩვენ შეიძლება შევიძინოთ საზენიტო საშუალებები, სარაკეტო თავდაცვის სისტემები და ა.შ. მაინც ყველაფერი უნდა წავიდეს იქითკენ, რომ ეს უნდა იყოს ერთიანი სისტემა, რომელიც უზრუნველყოფს მონიტორინგს, ველებს, ავტომატიკას, გამომთვლელ სისტემებს, რათა ერთ სისტემაში იყოს საქართველოს თავდაცვა, საქართველოს ცა. ჩემი კითხვა ისევ ის ტრადიციული იქნება: როდის გვექნება ისრაელივით დაცული ცა? როდესაც ვერ გაიჭაჭანებს მტრის მფრინავი ობიექტი და რაკეტების 90%-ის განადგურების საშუალება იქნება. კარგი იქნება თუკი ეს 2024 წლისთვის მოესწრება, მაგრამ თავდაცვის მინისტრისგან ამას მოვითხოვ ყველა ჩვენს შეხვედრაზე.”

ამას გარდა, დეპუტატი დაინტერესდა, როდის აღდგება კახეთში რიკიგზა. ზილფიმიანი ფიქრობს, რომ სარკინიგზო მიმოსვლა კახეთის სასოფლო-სამეურნეო პროდუქციას გააიაფებს:

“კახეთის რკინიგზამ რა დააშავა? დღეს ყველაზე დიდი პრობლემა საქართველოში და დედაქალაქში არის ის, რომ გლეხს და ქალაქის მცხოვრებელს შორის გადამყიდველები დგანან, რომლებიც უზრუნველყოფენ მამასისხლად იმ პროდუქტებს, რომლებსაც კაპიკებში ყიდულობენ გლეხებისგან. ჩვენ ხომ ვიცით, რომ კახეთია ბეღელი ძირითადად დედაქალაქის მომსახურების. სხვა კუთხეებს არ ვაკნინებ… ამ მატარებლის გახსნა იქნებოდა შველა და ინფრასტრუქტურის მინისტრისგან არ მივიღებ პასუხს, რომ ეს ან ძვირი ჯდება, ან მალე ვერ ამოვიღებთ [თანხას].”

ფაქტ-მეტრის ინფრმაციით, კახეთში რკინიგზის რეაბილიტაციაზე დაპირება ჯერ კიდევ 2012 წელს ხელისუფლებაში მოსვლამდე ბიძინა ივანიშვილმა გასცა, თუმცა ამ დრომდე რეგიონში რკინიგზა უფუნქციოა.

მასალების გადაბეჭდვის წესი